Dúısenbi, jetinshi qyrkúıekte Eıfel munarasy qyzmetkerlerdiń ereýiline baılanysty kelýshiler úshin jabyldy. Sebep — Bochasanwasi Akshar Purushottam Swaminarayan Sanstha (BAPS) ındýıstik dinı qozǵalysynyń iri delegasıasynyń talaby, olar kórikti jerge barýdy josparlaǵan, dep habarlaıdy infohub.kz saıty.
Basqa týrıserge qolaısyzdyq týdyrmaý úshin delegasıa qyzmet kórsetýshi uıymmen kelý ýaqytyn aldyn ala kelisip, nysanda áıelderdiń qatysýyn barynsha azaıtýdy suraǵan. Munara operatory SETE qonaqtarǵa qarsy shyqpaı, qyzmetkerlerge delegasıaǵa kózge túspeý kerektigin, al keıbir aımaqtarda áıelderdi er adamdarmen almastyrýdy buıyrǵan.
Bul buıryq qyzmetkerlerdiń narazylyǵyn týdyryp, olar ony kemsitýshilik dep sanap, ereýilge shyqqan. Fransıa Ulttyq jınalysynyń tóraǵasy Iael Braýn-Pıve bul oqıǵaǵa qatań jaýap berdi: «Qonaqjaılylyq bizdiń qundylyqtarymyzdan bas tartýdy bildirmeıdi. Fransıada áıelder qoǵamdyq ómirge tolyq qatysady. Eshkimniń olardyń kórinbeýin talap etýge quqyǵy joq».
Sońynda BAPS te, SETE kompanıasy da kópshilik aldynda keshirim surady. Munara operatory týrıserdiń sharttaryn qabyldaýǵa bolmaıtynyn moıyndady. Kórikti jerdiń resmı saıtynda seısenbide munara ádettegi rejımde jumysyn qaıta bastaǵany habarlanǵan. Dúısenbige bılet satyp alǵan týrıserge keshirim suraldy.