21-25 qyrkúıek aralyǵynda Qazaqstanda halyqaralyq avıasıalyq qaýipsizdik baǵalaýy (IASA) ótedi. Ony AQSh Federaldyq avıasıa ákimshiligi júrgizedi. Bul týraly Qazaqstan Respýblıkasy Kólik mınıstrliginiń baspasóz qyzmeti habarlady, dep jazady infohub.kz saıty.
Vedomstvonyń naqtylaýynsha, 2026 jylǵy baǵalaý FAA-men júrgizilip jatqan daıyndyq jumystarynyń jalǵasy. Sońǵy eki jylda Kólik mınıstrligi Qazaqstannyń Avıasıalyq ákimshiligimen jáne Qazaqstannyń AQSH-taǵy Elshiligimen birlesip, Qazaqstan men AQSh arasyndaǵy tikeleı áýe qatynasyn ashý baǵytynda jumys istep keledi.
«Baǵalaý memlekettiń ushý qaýipsizdigin qadaǵalaý júıesine qatysty júrgiziledi jáne Qazaqstan Respýblıkasynyń avıasıalyq organdarynyń 1-qosymshadaǵy «Avıasıalyq personalǵa kýálik berý», 6-qosymshanyń I bólimindegi «Halyqaralyq komersıalyq áýe kóligi – ushaqtar» jáne 8-qosymshadaǵy «Áýe kemeleriniń ushýǵa jaramdylyǵy» talaptarynda kórsetilgen qoldanystaǵy standarttar men usynylǵan tájirıbege sáıkestigin anyqtaýǵa baǵyttalǵan. Tekserý barysynda FAA sarapshylary avıasıalyq zańnamany, zańǵa táýeldi normatıvtik quqyqtyq aktilerdi jáne memlekettiń ushý qaýipsizdigin qamtamasyz etýdi memlekettik baqylaý júıesiniń segiz synı elementine sáıkes qadaǵalaý júrgizý qabiletin qarastyrady», — delingen habarlamada.
Sondaı-aq vedomstvo 24 qyrkúıekte FAA komandasynyń AQSh Kólik mınıstrliginen komersıalyq qyzmetke ruqsat alýǵa ótinim bergen Air Astana áýekompanıasyna tehnıkalyq sapary josparlanǵanyn málimdedi.
«Salardyń maqsaty — ashyqtyqty qamtamasyz etý prosesi aıasynda Qazaqstannyń Avıasıalyq ákimshiliginde alynǵan aqparatty rastaý. Bul sapar áýekompanıany paıdalanýshy sertıfıkatynyń ıegeri retinde tekserý bolyp sanalmaıdy. Aıaqtalǵan soń FAA Qazaqstannyń Avıasıalyq ákimshiligimen qorytyndy brıfıń ótkizip, keıin qaralǵan baǵyttar boıynsha jazbasha esep usynady. IASA baǵalaýyn júrgizý — ushý qaýipsizdigin memlekettik qadaǵalaý júıesin odan ári nyǵaıtýdyń jáne Qazaqstan men AQSh arasynda tikeleı áýe qatynasyn ashý jumysyn ilgeriletýdiń mańyzdy kezeńi», — dep naqtylady Kólik mınıstrligi.
Eske salaıyq, sáýirde Air Astana Qazaqstan men AQSh arasyndaǵy tikeleı áýe qatynasyn ashýǵa qandaı qıyndyqtar áser etip jatqanyn aıtqan bolatyn. Mamyrda Kólik mınıstri Nurlan Saýranbaev AQSH-qa tikeleı reısterdi 2027 jyldyń II toqsanynda iske qosýdy josparlap otyrǵanyn málimdegen.