Qazaqstanda İİM vedimistik oqý oryndaryna talapkerlerdi qabyldaý týraly jalǵan SMS-habarlamalar taratý jıilep ketti. Bul týraly İshki ister mınıstrligi eskertti, dep habarlaıdy infohub.kz.
Polisia.kz Telegram-arnasynyń málimetinshe, bul habarlamalar jalǵan jáne mınıstrlikke qatysy joq. «Qazirgi tańda qabyldaý naýqany áli jalǵasýda. Konkýrstyq irikteýdiń barlyq kezeńderi aıaqtalǵan joq. Qabyldaý belgilengen merzimde — 15-25 shilde aralyǵynda júrgizilýde», — dep túsindirdi vedomstvoda.
Qabyldaý naýqanynyń qorytyndy nátıjeleri irikteýdiń barlyq kezeńderi aıaqtalyp, qabyldaý komısıalary sheshim qabyldaǵannan keıin ǵana talapkerdiń Qyzmet police aqparattyq júıesindegi jeke kabınetinde qoljetimdi bolady. İİM aqparattyq júıe talapkerlerdi qabyldaý týraly SMS-habarlamalar jibermeıtinin atap ótti.
Azamattardan mundaı habarlamalarǵa senbeý, olardaǵy siltemelerge ótpeý, jeke derekterin habarlamaý jáne tek İİM-niń resmı aqparatyn paıdalaný suralady.