Fılıppınniń ońtústigindegi orta mektepte bolǵan atystan keminde bir adam qaza taýyp, birneshe adam jaraqat aldy. Oqıǵa juma kúni tústen keıin Mınadanao aralyndaǵy Ońtústik Kotabato provınsıasyndaǵy Banga ulttyq orta mektebinde boldy, dep habarlaıdy infohub.kz saıty.
Atysqan adamnyń jáne qurbandardyń kim ekeni ázirge anyqtalǵan joq. Jergilikti buqaralyq aqparat quraldary men resmı tulǵalar qaza tapqandar men jaraqat alǵandar sany týraly ártúrli derekter keltirip otyr.
Fılıppın Bilim mınıstrligi taratqan málimdemede oqıǵaǵa «qatty alańdaýshylyq» bildirilgen. «Bizdiń birinshi kezektegi mindetimiz — oqýshylardyń, muǵalimderdiń jáne mektep qyzmetkerleriniń qaýipsizdigi men ál-aýqaty», — delingen málimdemede. Vedomstvo quzyrly organdarmen birlesip oqıǵany tekserip, qajetti qoldaý kórsetýge kiriskenin jetkizdi.
«Barshańyzdy sabyr saqtaýǵa jáne tekserilmegen aqparatty taratpaýǵa shaqyramyz, óıtkeni quzyrly organdar tergeýdi jalǵastyryp jatyr», — dep atap ótti mınıstrlik.
Ońtústik Kotabato gýbernatory Reınaldo Tamaıo buǵan deıin jýrnalıserge bir adamnyń qaza tapqanyn, tórt adamnyń aýrýhanaǵa jatqyzylǵanyn aıtqan. Ol atysqan adamnyń kim ekenin naqtylamady jáne onyń qaza tapqandar ne jaraqat alǵandar qatarynda ekenin de kórsetpedi.
Jergilikti buqaralyq aqparat quraldary Fılıppınniń basqa da resmı organdaryna silteme jasap, qaza tapqandar men jaraqat alǵandar sany áldeqaıda kóp dep habarlap otyr.
Banga qalasynyń tótenshe jaǵdaılar basqarmasy taratqan málimdemege sáıkes, atysqa baılanysty «Banga mýnısıpalıtetiniń barlyq deńgeıdegi oqý oryndarynda» sabaq toqtatyldy.
Fılıppın Qyzyl Kres uıymy atystan keıin kómek kórsetý úshin medısınalyq toptardy jibergenin málimdedi.
Jergilikti buqaralyq aqparat quraldarynyń habarlaýynsha, polısıa qyzmetkerleri oqıǵa ornynda tergeý júrgizip jatyr.
Fılıppınde atys qarýymen jasalatyn qylmystar sırek emes — bul el aımaqtaǵy qarý ıelený deńgeıi eń joǵary memleketterdiń biri sanalady, alaıda mektepterdegi atys oqıǵalary onsha jıi kezdespeıdi.
Maýsym aıynda Fılıppınniń ortalyǵyndaǵy orta mektepte qurdastary oq jaýdyrǵannan keıin úsh oqýshy qaza taýyp, taǵy birneshe adam jaraqat alǵan bolatyn. Tergeýshiler bul qandy oqıǵany «bopsalaýǵa baılanysty kek» sebebinen boldy dep boljaǵan.