Germanıanyń burynǵy Syrtqy ister mınıstri Ioshka Fısher Eýropa memleketteri men Amerıka Qurama Shtattary arasyndaǵy qaıshylyqtar tereńdeı túsken jaǵdaıda Soltústik Atlantıkalyq alánstyń búgingi qalpynda saqtalyp qalýy ekitalaı dep kúmán bildirdi. Ol bul týraly nemis basylymy Die Zeit jarıalaǵan suhbatynda aıtty, dep habarlaıdy infohub.kz saıty.
Fısherdiń aıtýynsha, Eýropa men AQSh arasyndaǵy alshaqtyq NATO-nyń ydyraýyna ákelýi múmkin. «Birge bolsaq, kúshtimiz, biraq „trampıstermen“ ortaq normatıvtik negizimiz joq, muny moıyndaý qıyn bolsa da. NATO aman qalady dep oılamaımyn», — dedi ol.
Germanıanyń syrtqy saıasat vedomstvosynyń eks-basshysy transatlantıkalyq qatynastardy saqtap qalý úshin ózara is-qımyldyń jańa negizin qalyptastyrý qajet ekenin atap ótti. Onyń pikirinshe, bul úderiste sheshýshi róldi Eýropanyń ózi saıası jáne áskerı múmkindikterin nyǵaıtý arqyly atqarýy tıis.
Fısher sondaı-aq AQSH-tyń NATO-nyń eýropalyq bóligindegi ústemdik kezeńi aıaqtalǵanyn, aımaq elderi óz qaýipsizdigin derbes qamtamasyz ete alatyndaı bolýy kerektigin atap ótti.
Buǵan deıin NATO Bas hatshysy Mark Rútte alánstyń uıym basshylyǵynda eýropalyq elderdiń rólin kúsheıtý baǵytynda jalǵasyp kele jatqanyn málimdegen. Onyń aıtýynsha, Eýropada qaýipsizdikti qamtamasyz etýge degen kózqaras ózgerip jatyr.