Florıdanyń ońtústiginde naızaǵaı saldarynan ana men onyń eki jasar qyzy qaza tapty. Bul týraly jergilikti bılik habarlady. Qaıǵyly oqıǵa Fort-Loderdeıl mańyndaǵy Margeıt qalasynda jeksenbi kúni boldy. Qaza tapqandar — 31 jastaǵy Kenıa Glazgo jáne onyń qyzy Kennedı.
Kórshisi Prıns Mýdı jergilikti NBC News arnasyna bergen suhbatynda úıinde otyrǵanda qatty dybys estilip, úı dirildegenin aıtty. "Balam: 'Áke, jerde bir áıel jatyr. Oǵan naızaǵaı tıdi', - dedi", - dedi Mýdı telearnaǵa.
Ana men qyz kólikteriniń qasynan tabylyp, jergilikti aýrýhanaǵa jetkizildi. Biraq olardy qutqarý úshin bar kúsh salynǵanyna qaramastan, ekeýi de aýrýhanaǵa jetkennen keıin kóp uzamaı qaıtys boldy.
AQSh aýrýlardy baqylaý jáne aldyn alý ortalyqtarynyń (CDC) derekterine sáıkes, Amerıka Qurama Shtattarynda jyl saıyn shamamen 37 mıllıon naızaǵaı túsedi. Alaıda naızaǵaı tıý yqtımaldyǵy óte tómen — CDC málimetinshe, bul kórsetkish mıllıonnan birden az. Al zardap shekkenderdiń shamamen 90 paıyzy aman qalady.