Florıdada ólim jazasyna kesilgen 72 jastaǵy Denıel Konahannyń advokattary AQSh Joǵarǵy sotyna onyń ólim jazasyn oryndaýdy toqtatý týraly ótinish joldady. Bul týraly infohub.kz saıty habarlaıdy.
Konahan 1996 jyly Rıchard Montgomerıdi urlap, óltirgeni úshin ólim jazasyna kesilgen edi. Onyń máıiti Florıda shtatynyń Sharlott okrýgindegi ormandy alqaptan tabylǵan. Quqyq qorǵaý organdarynyń málimetinshe, Konahan Montgomerıdi jalańash sýretke túsirý úshin aqy tólep, sodan keıin ony óltirgen. Sondaı-aq ol 1990 jyldary Florıdanyń ońtústik-batysynda osyǵan uqsas birneshe kisi óltirýge qatysy bar dep kúdiktenedi.
Konahan Montgomerıdiń ólimine qatysy joq ekenin birneshe ret málimdegen. Advokattary onyń 2025 jyldyń naýryz aıynan beri oqıǵa ornynan jáne Montgomerıdiń denesinen alynǵan dáleldemelerge DNQ saraptamasyn júrgizýdi talap etip kelgenin aıtady. Olardyń pikirinshe, bul saraptama onyń kinásizdigin dáleldeı alady.
Florıda gýbernatory Ron Desantıs Konahannyń DNQ saraptamasyna qatysty ótinishi qaralyp jatqan kezde, ıaǵnı 11 tamyzda onyń ólim jazasyna qatysty orderge qol qoıǵan. Al orderge qol qoıylǵannan keıin 24 saǵat ishinde shtattyq sot Konahannyń DNQ saraptamasy týraly ótinishin qabyldamaǵan.
Advokattardyń ótinishinde: "Konahan myrza ózin kinásiz dep tanýdy suramaıdy, ol túrmeden bosatýdy da suramaıdy. Ol tek ólim jazasyn oryndaýdy toqtatyp, onyń negizdi talaptaryn qaraýdy suraıdy", — delingen.
Aıta keteıik, bıyl Florıda shtatynda 14 adam ólim jazasyna kesilgen.