Fly Arystan áýekompanıasy jolaýshylarǵa reısterdiń keshigýi men toqtatylýyna baılanysty máselelerdi ózdiginen sheshýge múmkindik beretin jańa qyzmetti iske qosqanyn habarlady, dep habarlaıdy infohub.kz saıty.
Áýekompanıanyń baspasóz qyzmetiniń málimetinshe, kompanıa reıster keshiktirilgen nemese toqtatylǵan jaǵdaıda jolaýshylarǵa arnalǵan jańa sıfrlyq ózine-ózi qyzmet kórsetý júıesin engizýde. Jańa qyzmet jolaýshylarǵa kontakt-ortalyqqa habarlasýdyń qajeti joq, odan ári áreket etýdiń qoljetimdi nusqalaryn onlaın rejımde ózdiginen tańdaýǵa múmkindik beredi.
Ushýǵa 72 saǵattan az ýaqyt qalǵanda reıs keshiktirilse nemese toqtatylsa, jolaýshylar bıletti rásimdeý kezinde kórsetilgen WhatsApp nemese elektrondyq poshta arqyly jekelendirilgen habarlama alady. Habarlamada reıstiń ózgerýi týraly negizgi aqparat, onyń ishinde ushýdyń bastapqy jáne jańa ýaqyty kórsetiledi.
WhatsApp nemese elektrondyq hattaǵy biregeı silteme arqyly jolaýshy jekelendirilgen veb-paraqshaǵa ótedi. Tirkelý nemese qosymsha derekterdi engizý qajet emes. Paraqshada naqty reıs, bılet jáne ózgeris sıpatyna qaraı qoljetimdi áreket nusqalary avtomatty túrde kórsetiledi.
Jaǵdaıǵa baılanysty jolaýshy: jańa ýaqytty qabyldaı alady — reısti aýystyrýdy rastaıdy; basqa ýaqytqa nemese kúnge aıyrbastaı alady — balamaly reısti tańdaıdy; qaıtarýdy rásimdeı alady — eger bul áýekompanıa erejelerinde qarastyrylǵan bolsa.
Jekelendirilgen qyzmetti Fly Arystan-nyń barlyq jolaýshylary bıletti satyp alý arnasyna qaramastan paıdalana alady. Alaıda sıfrlyq platforma arqyly tikeleı qaıtarýdy tek Fly Arystan resmı saıtynda nemese mobıldi qosymshasynda bılet satyp alǵan jolaýshylar ǵana rásimdeı alady. Týragenttikter nemese onlaın-agregatorlar arqyly bılet satyp alǵan jolaýshylar bıletti satyp alǵan jerde qaıtarýdy rásimdeı alady.
Sonymen qatar, jolaýshylarǵa reıs 5 saǵattan az ýaqytqa keshiktirilgen jaǵdaıda, áýekompanıa erejeleri aıyppulsyz májbúrli qaıta brondaý nemese aqsha qaıtarý múmkindigin qarastyrmaıtynyn eske saldy. Mundaı jaǵdaıda sıfrlyq qyzmette jolaýshyǵa tek «Jańa ýaqytty qabyldaý» opsıasy qoljetimdi bolady.