Qazaqstandyq loýkoster FlyArystan Aqtaý — Dýbaı — Aqtaý baǵyty boıynsha ushýlardy qaıta bastaýdy taǵy da keıinge shegerdi. Bul joly úzilis keminde 2026 jyldyń 15 qyrkúıegine deıin sozylady, dep habarlaıdy infohub.kz saıty.
Bastapqyda avıakompanıa bul baǵyttaǵy reısterdi 29 tamyzda qaıta bastaýdy josparlaǵan edi, alaıda qazir shekteýler taǵy eki aptadan astam ýaqytqa uzartyldy. Sebep — Taıaý Shyǵystaǵy turaqsyz jaǵdaı.
«FlyArystan avıakompanıasy Aqtaý — Dýbaı — Aqtaý baǵyty boıynsha reısterdiń oryndalýyn toqtatý Taıaý Shyǵystaǵy turaqsyz jaǵdaıǵa baılanysty 2026 jyldyń 15 qyrkúıegine deıin uzartylǵanyn habarlaıdy», — delingen tasymaldaýshynyń resmı málimdemesinde.
Reısteri bolmaǵan jolaýshylarǵa aıyppulsyz bılet qunyn tolyq qaıtarý usynylady. Ol úshin bılet satyp alynǵan jerge júginý qajet.
Eske sala keteıik, bıylǵy jyldyń naýryz aıynda FlyArystan aımaqtaǵy turaqsyz jaǵdaı men áýe qatynasyna engizilgen shekteýlerge baılanysty osy baǵyt boıynsha ushýlardy ýaqytsha toqtatqan bolatyn. Sol kezde de jolaýshylarǵa aqshany tolyq qaıtarý nemese keıingi kúnderge tegin qaıta brondaý usynylǵan edi.