Flydubai áýekompanıasy Saýd Arabıasynda shuǵyl qonǵan reıske qatysty tergeý aıaqtalǵansha Izraılge jáne keri baǵyttaǵy reısterin toqtatty. Bul týraly tasymaldaýshy resmı málimdeme jasady, dep habarlaıdy infohub.kz saıty.
«30 qyrkúıekte bolǵan FZ 1073 reısindegi oqıǵadan keıin tıisti organdarmen kelise otyryp, Flydubai tergeý júrgizilip jatqan kezeńde Izraılge jáne Izraılden reısterdi toqtatady», — delingen áýekompanıanyń málimdemesinde.
Tasymaldaýshynyń pikirinshe, toqtatý tıisti organdarǵa jumysyn jalǵastyryp, bolǵan oqıǵanyń barlyq mán-jaıyn anyqtaýǵa múmkindik beredi.
«Biz qazirgi tergeýge jan-jaqty kómek kórsetýge jáne barlyq baǵyttarymyzda qaýipsizdiktiń eń joǵary standarttaryn saqtaýǵa tolyq daıynbyz. Memlekettik organdarmen, retteýshi qurylymdarmen jáne áýejaı ókilderimen tyǵyz baılanystamyz. Jańa aqparat túsken saıyn ushýlardy toqtatý týraly sheshimdi qaıta qaraımyz», — delingen málimdemede.
Eske salaıyq, Izraıl Áskerı-áýe kúshteriniń ıstrebıtelderi ushaqqa qaraı kóterilgen bolatyn. Keıin áýe kemesi Saýd Arabıasyna qonǵany belgili boldy. Sodan soń Flydubai ızraıldik telearnaǵa Dýbaı — Tel-Avıv reısinde ushqyshtar arasynda ushaq bortynda tóbeles bolǵanyn habarlady.
Kóp uzamaı ushaqtan alǵashqy foto men beınejazbalar paıda boldy. Sýrette shabýyldaýshymen kúresken, boljam boıynsha, jolaýshy beınelengen. Al bılik ushqyshtardyń biri ushaqty ádeıi qulatpaq bolǵan degen nusqany tekserýde. Onyń áreketin ekinshi ushqysh pen onymen kúreske túsip, apattyń aldyn alǵan ızraıldik jolaýshylar toqtatqan dep boljanady.
Sondaı-aq ushqyshtardyń azamattyǵy týraly taǵy bir nusqa aıtyldy. Reseı men Ýkraına azamattyǵy týraly nusqadan keıin ushqyshtardyń Oman men BAÁ azamattyǵy bar degen derekter shyqty.
Odan ári ushqyshtardyń biri shabýyldan keıin pyshaq jaraqatynan kóz jumýy múmkin degen aqparat paıda boldy.
BAQ sondaı-aq Ýkraına men Reseıden kelgen ushqyshtar jolaýshy retinde ushyp, FlyDubai ushaǵynyń basqarýyn qolǵa alǵanyn jazdy.
Keıinirek FlyDubai ushaǵynyń bortynda áriptesiniń shabýylynan zardap shekken ushqysh Úndistan azamaty Smıt Machchhar bolǵany belgili boldy.