Dýbaı — Tel-Avıv baǵytynda ushqan Flydubai áýekompanıasynyń Boeing 737 jolaýshylar laıneri Saýd Arabıasy ústinen burylys kezinde apattyq dabyl berip, Tabýk áýejaıyna shuǵyl qondy. NUR.KZ RIA Novostıge silteme jasap habarlaǵandaı, keme kapıtany men ekinshi ushqysh jaraqat alyp, medısınalyq kómek kórsetý úshin aýrýhanaǵa jatqyzyldy, dep jazady infohub.kz saıty.
RIA Novostı Al-Arabiya telearnasynyń ushqyshtardyń jaǵdaıy týraly habarlamasyn aýdaryp keltiredi: «Flydubai laıneriniń kapıtany men onyń kómekshisi (ekinshi ushqysh — red. eskertpesi) jaraqat aldy... olar medısınalyq kómek kórsetý úshin aýrýhanaǵa jatqyzyldy».
Buǵan deıin ushaq urlaý nemese zańsyz aralasý degendi bildiretin 7500 kodyn bergeni habarlanǵan. Áýe kemesine qaraı Izraıl Áskerı-áýe kúshteriniń ıstrebıtelderi kóterilgen, keıin laınerdiń Saýd Arabıasyna qonǵany belgili boldy.
Flydubai áýekompanıasy ızraıldik teledıdarǵa Dýbaı — Tel-Avıv reısinde ushqyshtar arasynda tóbeles bolǵanyn málimdedi. Kóp uzamaı ushaqtan alǵashqy foto men vıdeo paıda boldy: sýrette shabýyldaýshymen kúreskeni boljam etilgen jolaýshy beınelengen.
Bılik ushqyshtardyń biri ushaqty ádeıi qulatpaq boldy degen nusqany tekserýde. Onyń áreketin ekinshi ushqysh pen onymen kúreske túsip, apattyń aldyn alǵan ızraıldik jolaýshylar toqtatty dep boljanady.
Sondaı-aq Flydubai ushaǵy ushqyshtarynyń azamattyǵy týraly taǵy bir nusqa aıtyldy. Reseı men Ýkraına azamattyǵy týraly nusqadan keıin ushqyshtardyń Oman men Birikken Arab Ámirlikteriniń azamattyǵy bar degen derekter shyqty.
Odan keıin ushqyshtardyń biri shabýyldan keıin pyshaq jaraqatynan kóz jumýy múmkin degen aqparat paıda boldy. Buǵan deıin Dýbaı — Tel-Avıv reısindegi tótenshe jaǵdaıdy 180 ızraıldikti óltirýge áreket dep ataǵanyn habarlaǵan bolatynbyz.