Apattyq dabyl bergen FlyDubai áýekompanıasy ushaǵynyń bir pıloty ushý kezindegi shabýyldan keıin pyshaq jaraqatynan qaza tapqan bolýy múmkin, dep habarlaıdy infohub.kz saıty.
NUR.KZ agenttigi «Izvestıa» basylymyna silteme jasap, ol óz kezeginde Walla atty ızraıldik basylymǵa silteme jasaǵanyn habarlaıdy. Atalǵan ushaq Saýd Arabıasyna shuǵyl qonǵan. Rastalmaǵan derekterge qaraǵanda, bir pılot shabýyldan keıin pyshaq jaraqatynan qaza tapqan bolýy múmkin.
«Rastalmaǵan habarlamalarǵa sáıkes, áýede pyshaq jaraqatyn alǵan pılot ushý barysynda qaza tapty», — delingen habarlamada.
Buǵan deıin BAQ-ta Boeing 737 jolaýshylar ushaǵy Saýd Arabıasy ústinen burylys kezinde apattyq dabyl bergeni týraly aqparat paıda boldy. Ol ushaqty urlaýdy nemese zańsyz aralasýdy bildiretin 7500 kodyn jibergen.
Izraıl Áskerı-áýe kúshteriniń ıstrebıtelderi ushaqqa qaraı kóterildi. Keıin áýe kemesiniń Saýd Arabıasyna qonǵany belgili boldy.
Sodan keıin Flydubai áýekompanıasy ızraıldik telearnaǵa Dýbaı — Tel-Avıv reısinde ushaq bortynda pılottar arasynda tóbeles bolǵanyn habarlady. Jergilikti BAQ ekıpaj eki pılottan turǵanyn, bireýi Reseıden, ekinshisi Ýkraınadan ekenin málimdedi.
Izraıl premer-mınıstri Bınámın Netanáhý keńsesinde apattyq dabyl bergen FlyDubai áýekompanıasy ushaǵyndaǵy tótenshe jaǵdaıǵa qatysty pikir bildirdi.
Keıinirek ushaqtan túsirilgen alǵashqy kadrlar, sondaı-aq qoný kezinde túsirilgen beıneler paıda boldy. Jolaýshylar qoný barysynda án salyp, qol soqqan.
Sondaı-aq FlyDubai áýekompanıasy ushaǵy pılottarynyń azamattyǵy týraly taǵy bir nusqa aıtyldy. Reseı jáne Ýkraına azamattyǵy týraly nusqadan keıin pılottardyń Oman jáne BAÁ azamattyǵy bar ekeni týraly derekter paıda boldy.