Flydubai әуекомпаниясының екінші ұшқышы, 29 жастағы Оман азаматы Хамам Әл-Хаммами тергеуге 2001 жылы АҚШ-та болған 11 қыркүйек шабуылдарынан шабыттанып, өзін-өзі жарып жіберу терактін жоспарлағанын мойындады, деп хабарлайды infohub.kz сайты.
БАӘ Бас прокуроры Хамад Сейф әш-Шамсидің мәлімдеуінше, айыпталушы барынша көп адамның өмірін қию үшін басып алынған Boeing 737 Max жолаушылар ұшағын Тель-Авивтегі Бен-Гурион әуежайының терминалына бағыттауды көздеген.
Күдікті бағыт пен әуежаймен танысу үшін Тель-Авивке екі рейс жасаған. Ол Flydubai компаниясына жұмысқа орналаспай тұрып, барлық қажетті қауіпсіздік тексерулерінен өтіп, ұшқыш куәлігі мен соттылығы жоқтығы туралы анықтаманы ұсынған.
Flydubai компаниясының 30 қыркүйекте Дубайдан Тель-Авивке ұшқан жолаушылар ұшағы басып алу әрекеті туралы сигналдан кейін Сауд Арабиясының Табук қаласындағы әуежайға апаттық қонды. Себебі ұшқыштар кабинасындағы төбелес болды, оның барысында ұшақ небәрі 29 секундта биіктігін 9410 метрден 5105 метрге дейін күрт жоғалтты.
Boeing 737 MAX 8 бортында 174 адам, оның ішінде 27 бала болған, олардың көбісі Израиль азаматтары. Кейбір жолаушылардың айтуынша, әуелі ұшқыштар кабинасынан айқай естілген, кейін кабина есігі ашылып, бір ұшқыштың жараланғанын, киімі қанға боялғанын көрген. Оған алғашқы көмек көрсетілген, жолаушылардың бірі дәрігер болып шыққан. Экипаж мүшелері мен рейс жолаушылары шабуылдаушыны да залалсыздандырған.
Сауд Арабиясындағы қонуды бортта жолаушы ретінде отырған басқа екі ұшқыш жасап, авиаапаттың алдын алды. CNN телеарнасының мәліметінше, ұшақты келесі рейсті орындауы тиіс екі «қосалқы ұшқыш» қондырған.
Бұған дейін «Курсив» Израиль Премьер-министрі Биньямин Нетаньяху Дубай — Тель-Авив рейсінің капитанына шабуыл жасаған flydubai екінші ұшқышы радикалды исламдық идеологиялық өңдеуден өткенін мәлімдегенін жазған.