FlyDubai áýekompanıasynyń ushaǵynda áriptesiniń shabýylynan zardap shekken ushqysh — Smıt Machchhar esimdi Úndistan azamaty bolýy múmkin. Bul týraly infohub.kz saıty habarlaıdy.
Hindustan Times basylymynyń dereginshe, Machchhar Dýbaıdan Tel-Avıvke ushqan reıste ekıpaj komandıri bolǵan. Sol kezde ekinshi ushqysh oǵan pyshaq salǵan. Osyǵan baılanysty ushaq Saýd Arabıasy áýejaıyna shuǵyl qondy. Zardap shegýshiniń jaǵdaıy týraly málimet joq.
Machchhar 2022 jyldyń maýsymynan beri FlyDubai áýekompanıasynyń Boeing 737 ushaqtarynda komandır bolyp jumys istegeni habarlandy. Oǵan deıin ol Mýmbaıdaǵy SpiceJet áýekompanıasynda 11 jyl eńbek etip, ekıpaj komandıri qyzmetin atqarǵan, al 2020 jyldyń qarashasynan bastap basqa ushqyshtardy oqytyp, teksergen nusqaýshy bolǵan. Profılinde 737-800 jáne 737 MAX 8, 9 úlgilerindegi ushaqtarda 9 750 saǵat ushqany kórsetilgen.
Basylym silteme jasaǵan LinkedIn profıline sáıkes, Machchhar FlyDubai áýekompanıasyna birden áýe kemesiniń komandıri qyzmetine kelgen. Profılde onyń SpiceJet áýekompanıasynda komandır retinde 6 400 saǵattan astam ushqany jáne FlyDubai nusqaýshylar tobyna qosylǵysy keletini jazylǵan.
Izraıl ÁÁK-niń ıstrebıtelderi ushaqqa qaraı kóterilgen. Keıin áýe kemesiniń Saýd Arabıasyna qonǵany belgili boldy. Sodan soń Flydubai áýekompanıasy ızraıldik telearnaǵa Dýbaı–Tel-Avıv reısinde ushqyshtar arasynda ushaq bortynda tóbeles bolǵanyn málimdedi. Jýyrda ushaqtan alǵashqy foto men vıdeo paıda boldy. Sýrette shabýyldaýshymen kúresken jolaýshy beınelengen. Al bılik ushqyshtardyń biri ushaqty ádeıi qulatpaq bolǵan degen nusqany tekserýde. Onyń áreketin ekinshi ushqysh pen kúreske túsken ızraıldik jolaýshylar toqtatyp, apattyń aldyn alǵan dep boljanady.
Sondaı-aq ushqyshtardyń azamattyǵy týraly taǵy bir nusqa aıtyldy. Reseı jáne Ýkraına azamattyǵy týraly nusqadan keıin ushqyshtardyń Oman jáne BAÁ azamattyǵy bar degen derekter shyqty.
Keıin ushqyshtardyń biri shabýyldan keıin pyshaq jaraqatynan qaza tabýy múmkin degen aqparat paıda boldy.
Sondaı-aq BAQ Ýkraına men Reseıden kelgen ushqyshtar jolaýshy retinde ushyp, FlyDubai ushaǵynyń basqarýyn qolǵa alǵanyn habarlady.