Forbes jýrnalynyń bas redaktory Rendall Leın ótken aıda qyzmetinen ketken edi. Onyń bıznes-seriktesinen $6 mln qabyldaǵany úshin jumystan shyǵarylǵany habarlandy. Bul týraly New York Times gazeti jazdy, dep habarlaıdy infohub.kz saıty.
New York Times-tiń habarlaýynsha, Leınge aqshany Shook Research kompanıasynyń negizin qalaýshy RJ Shook tólegen. Bul kompanıa 2016 jyldan beri Forbes-pen birlesip, baılyq keńesshileriniń reıtıńin jarıalap keledi. Tólem Shook kompanıasynyń baqylaý paketin jeke menshik kapıtal fırmasyna satqannan keıin bir jyl ótken soń jasalǵan.
Associated Press agenttiginiń qaraýyna ilikken 23 shildedegi ishki elektrondyq hatta Leınniń kompanıada endi jumys istemeıtini rastalǵan. Onda onyń ketý sebebi týraly eshqandaı málimet joq. Leın Forbes-te 16 jylǵa jýyq jumys istep, 2017 jyldan beri bas redaktor qyzmetin atqarǵan.
Máseleniń sezimtaldyǵyna baılanysty atyn atamaýdy ótingen Forbes qyzmetkeri AP-ge jumystan shyǵarýdyń naqty sebebin qyzmetkerler Times maqalasynan bilgenin aıtqan. Keıin taratylǵan hatta kompanıa bul máselege qatysty túsinikteme bere almaıtynyn málimdegen.
Times gazeti Leınniń oıyn biletin adamǵa silteme jasap, ol tólemdi jyldar boıy Shook-qa bergen keńesteri úshin syılyq dep sanaǵanyn jazǵan. Leın Times-ke bergen málimdemesinde: "Men qatelik jiberdim jáne ol úshin jaýapkershilikti óz moınyma alamyn. Men syılyqty jarıa etýim kerek edi, al ony jasamaýym — úlken qatelik. Men buǵan qatty ókinemin jáne osyǵan baılanysty súıikti jumysym men komandamnan aıyryldym", — degen.
Leın men Forbes ókili AP-tiń suraqtaryna jaýap bermedi. Shook-tyń Leınge ne úshin aqsha tólegeni belgisiz. Alaıda kompanıa men Forbes arasynda tyǵyz baılanys bolǵan sıaqty. Mysaly, Shook Research óz saıtynda Forbes-pen birlesip jasaǵan baılyq keńesshileri men basqarý toptarynyń 12 reıtıńin kórsetedi.
Forbes-tiń redaksıalyq qundylyqtar men standarttar týraly málimdemesinde kompanıa "barlyq qyzmetkerler men avtorlarǵa olardyń materıaldarynda kórsetilgen adamdardan, kompanıalardan nemese toptardan kez kelgen nysandaǵy aqy, artyqshylyq nemese qyzmet qabyldaýǵa tyıym salady" delingen.
Times-tiń bul habary BAQ-qa degen qoǵamdyq senim tómendegen kezeńde jaryq kórdi. Pew Research Center-diń aqpan aıyndaǵy zertteýine sáıkes, amerıkandyqtardyń kópshiligi (57%) jýrnalıserdiń qoǵam múddesine saı áreket etetinine senimderi tómen ekenin aıtqan.
Forbes 1917 jyly qurylyp, korporatıvtik Amerıka týraly yqpaldy eki aptalyq basylymǵa aınaldy. Onyń muqabasynda Stıv Djobs pen Ýorren Baffet sıaqty ataqty tulǵalar beınelengen.