AQSH-tyń iri avtokólik óndirýshileri prezıdent Donald Tramptyń el aýmaǵynda qytaı kompanıalarynyń zaýyt salýyna ruqsat beretin bastamasyn qoldamady. Ford, General Motors jáne Stellantis múddesin qorǵaıtyn salalyq keńes teń emes básekelestik qaýpi týraly eskertti, dep habarlaıdy infohub.kz saıty.
Buǵan deıin Aq úı basshysy qytaı avtokólik óndirýshileriniń AQSH-ta kásiporyn salýyna qarsy emestigin málimdegen. Onyń aıtýynsha, basty shart amerıkandyq jumysshylardy jumyspen qamtý bolýy tıis. Tramp Japonıa óndirýshileriniń tájirıbesimen salystyrdy, olar qazirdiń ózinde AQSh aýmaǵynda avtomobıl shyǵarady.
Ford, General Motors jáne Stellantis ustanymyn American Automotive Policy Council (AAPC) jetekshisi Mett Blant jetkizdi. Ol qytaı avtokólik óndirýshileri memlekettik qoldaý, valúta saıasatynyń erekshelikteri jáne basqa da naryqtyq emes tetikter esebinen artyqshylyq alatynyn eske saldy. Onyń pikirinshe, osy faktorlardy joımaı, qytaı kompanıalaryn amerıkandyq naryqqa jiberý jergilikti avtokólik óndirýshilerine, jumysshylarǵa jáne ónerkásiptik qaýymdastyqtarǵa zıan keltirýi múmkin.
Ahýaldy amerıkandyq bıliktiń buǵan deıin Ford-ty qytaılyq CATL jáne Geely-men yntymaqtastyǵy úshin synaǵany qıyndatyp otyr. Qyrkúıekte AQSh kólik mınıstri Shon Daffı de Ford-ty qytaı tehnologıalary men óndirisine táýeldilikti azaıtýǵa shaqyrǵan.
Qytaı avtokólik óndirýshileriniń básekelestigi kórshiles naryqtarda áldeqashan baıqalady. Meksıkada QHR brendteri jańa kólikter naryǵynyń shamamen 20%-yn alyp otyr. Kanada da qytaılyq avtomobılderdiń shekteýli ımportyna tómendetilgen tarıftermen ruqsat berýge daıyndalyp jatyr.
AlixPartners taldaý kompanıasy 2030 jylǵa qaraı qytaı brendteri álemdik avtonaryqtyń 30%-yna deıin baqylaýy múmkin dep boljaıdy.
Buǵan deıin Kýrsıv Avto Hyundai-diń AQSH-ta qytaılyq elektromobılder men gıbrıdterdiń yqtımal ósýine alańdaýshylyq bildirgenin habarlaǵan.