Fransıada bilim salasyndaǵy narazylyq kúsheıip, tártip saqshylary men stýdentter arasynda qaqtyǵys týdy. Belfor qalasynda polıseıge shabýyl jasalǵan narazylyqtan keıin 17 jastaǵy jasóspirim adam óltirýge oqtalý kúdigimen ustaldy, dep habarlaıdy infohub.kz saıty.
Bilim mınıstrliginiń málimetinshe, tártipsizdikter kezinde keminde 65 qyzmetker zardap shekken.
Parıjdiń Panten qala mańynda narazylyq bildirýshiler polıseılerge túrli zattar laqtyrǵan soń, tártip saqshylary olarǵa shabýyldap, birneshe adamdy ustady.
Al Strasbýrgte jaǵdaı ýshyǵýy múmkin dep qaýiptengen polısıa kóz jasaýysh gaz qoldandy, dep habarlaıdy Reuters aqparat agenttigi.
Renn men Parıjde qoqys jáshikteri órtelgen.
«Bizge kelsek, biz jeńdik — búgin tańerteń mektebimiz jabyq», — dedi 16 jastaǵy narazylyq bildirýshi Lola AFP aqparat agenttigine juma kúni.
Onyń aıtýynsha, polısıanyń áreketteri jaǵdaıdy odan ári ýshyqtyrǵan.
«Bul bizdi odan beter ashýlandyrady — polısıanyń bizdi urýǵa nemese kóz jasaýysh gaz qoldanýǵa quqyǵy joq», — dep qosty ol.
Polısıa narazylyq bildirýshilerden tárkilengen keıbir zattardyń sýretterin jarıalady, olardyń qatarynda benzın quıylǵan bótelkeler, balta jáne mınomettik otshashý dep atalatyn qurylǵylar bar.
Bilim mınıstrligi mektep qaqpalaryna, kireberisterine jáne qorshaýlaryna jasalǵan shabýyldardan keıin oqý oryndarynyń nysandaryna «aıtarlyqtaı zalal» keltirilgenin málimdedi.
Aımaqtyq úkimettiń málimetinshe, Nant qalasyndaǵy Nelson Mandela atyndaǵy lıseıde órt shyǵyp, ǵımarattyń shyny kireberisi men ishki bólikteriniń bir bóligi joıylǵan soń, zalal mólsheri 2 mıllıon eýrodan (1,7 mıllıon fýnt sterlıń) asqan.