1 qyrkúıekten bastap Fransıada 15 jasqa tolmaǵandarǵa áleýmettik jelilerde tirkelýge tyıym salynady. Zań jobasy parlamenttiń eki palatasynda maquldanyp, prezıdent qol qoıǵanǵa deıin Fransıa Konstıtýsıalyq keńesiniń qaraýyna jiberildi, dep habarlaıdy infohub.kz saıty.
Tirkelýge tyıym salýmen qatar, zań onlaın-platformalardy 2027 jyldyń 1 qańtaryna deıin osy jastaǵy balalardyń barlyq bar akkaýnttaryn joıýǵa mindetteıdi. Sondaı-aq joǵary synyptarda uıaly telefondardy paıdalanýǵa tyıym salynyp, áleýmettik jeliler fransýzdyq derbes derekterdi qorǵaý jónindegi retteýshiniń talaptaryna sáıkes jas tekserý sharalaryn engizýi kerek.
Le Parisien basylymynyń atap ótýinshe, zań jobasynda platformalardyń paıdalanýshylardyń jasyn qalaı rastaıtyny naqtylanbaǵan — ádisterdi tańdaý áleýmettik jelilerdiń óz erkine qaldyrylǵan.
Bul bastama fransýzdyq densaýlyq saqtaý salasyndaǵy qadaǵalaý organynyń TikTok, Instagram jáne Snapchat sıaqty platformalardyń balalarǵa tıgizetin zıandy áseri týraly eskertýinen keıin paıda boldy. Yqtımal qaýipter qatarynda ózin-ózi baǵalaýdyń tómendeýi, ózine zıan keltirý, sýısıd jáne esirtki qoldaný jaǵdaılarynyń artýy atalǵan.
Fransıa mundaı tyıym salǵan Eýropalyq Odaqtaǵy alǵashqy el bolady. Uqsas sharalar Birikken Arab Ámirlikterinde qabyldanǵan, al 2027 jyldan bastap Ulybrıtanıada da tyıym kúshine enedi. Qazaqstanda da balalardyń áleýmettik jelilerge tirkelýine shekteý qoıý máselesi pysyqtala bastady.