Fransıada juma kúni 400 mektep jabyldy. Bılik narazylyqty «qalalyq tártipsizdikke» aınaldy dep baǵalap otyr. Bul týraly Fransıa bilim mınıstrliginiń sońǵy derekterine silteme jasap infohub.kz saıty habarlaıdy.
Mınıstrliktiń málimetinshe, osy aptada órshigen oqýshylar narazylyǵy barysynda 100-ge jýyq mektep aýyr zardap shekti, 40 mektep dırektory jaraqat aldy.
Oqýshylardyń talap-narazylyǵy birneshe sebepten týyndaǵan: sabaq kestesiniń tym tyǵyzdyǵy, synyptardyń tolyp ketýi, muǵalimderdiń jetispeýi jáne bıylǵy jazdaǵy aptap ystyqta synyptardaǵy tózgisiz jaǵdaı. Bara-bara qaqtyǵysqa aınalǵan narazylyqqa qarsy tártip saqshylary jumyldyryldy.
İshki ister mınıstrliginiń habarlaýynsha, narazylyq bastalǵannan beri 15 pen 18 jas aralyǵyndaǵy 3 myńǵa jýyq lıseı oqýshysy ustaldy, onyń 1 949-y tek beısenbi kúni ustalǵan.
Keshe túnde jergilikti prokýrorlarmen sóılesken ádilet mınıstri Jerald Darmanen olardy azamattyq jaýapkershilik talaptaryn qozǵaýǵa shaqyrdy. Bul arqyly balalary keltirgen zalal úshin ata-analar qarjylaı jaýapty bolady.
Al bilim mınıstri Edýard Jeffre ata-analardan kómek surap, «balalar kóshede qaýipte» dep eskertti.
Alaıda shıelenistiń basylý belgisi joq. Alǵashqy oqıǵalar Strasbýrgtegi Jan-Rostan lıseıiniń jáne Marseldegi Sımon-Veı lıseıiniń mańynda tirkeldi. Búgin 400 mektep jabyq tur.
Fransıanyń ońtústigindegi Býsh-dú-Ron prefekti Jak Vıtkovskı BFMTV telearnasyna bergen suhbatynda alańdaǵy jaǵdaı beısenbidegi tártipsizdiktermen «salystyrýǵa kelmeıtinin», búgin narazylyqqa «áldeqaıda az adam» qatysqanyn aıtty. Onyń sózinshe, aımaqtaǵy 11 mektep zardap shekken, 55 mektep qashyqtan oqýǵa kóshti.
Osy aptadaǵy narazylyqtardan kelgen shyǵyn júzdegen mıllıon eýroǵa jetýi múmkin. Overn-Rona-Alpi aımaǵy 25 mıllıon eýro zalal kórgenin málimdedi.