Францияның оңтүстігіндегі Обань қаласындағы Лаканаль орта мектебінде дүйсенбі таңертең директор мен мұғалім оққа ұшты, ал оқушы қамауға алынды. Бұл туралы қала әкімі Жан-Пьер Скиллари мәлімдеді, деп хабарлайды infohub.kz сайты.
Оқиға болған соң тоғызыншы сынып оқушысы дереу ұсталды. Француз бұқаралық ақпарат құралдары күдіктінің 14 жаста екенін жазды. Әкімнің айтуынша, балалар зардап шекпеді, ал мұғалімдердің жарақаты өмірге қауіп төндірмейді.
BFMTV телеарнасы мен Le Parisien газеті тергеуге жақын дереккөздерге сілтеме жасап, оқиға мектеп жағдайына қатысты наразылық шараларына байланысты емес деп хабарлады.
Білім министрі Эдуард Жеффре әлеуметтік желідегі жазбасында: «Ұлттық білім жүйесінің екі қызметкері — директор мен мұғалім — бүгін таңертең Обаньдағы Лаканаль орта мектебінде оқ жарақатын алды. Қылмыскер оқушы болуы мүмкін», — деп жазды.
Ол дүйсенбі күні түстен кейін ішкі істер министрі Лоран Нюнезбен бірге оқиға орнына барады. Францияның оңтүстігіндегі Марсель маңындағы бұл мектепке оқушы қарумен кіріп, бірнеше рет оқ атқаны, содан кейін мектеп қызметкері оны ұстап алғаны айтылды.
53 жастағы директор аяғынан, ал 37 жастағы мұғалім санынан жарақат алған. Әкім Скиллари әлеуметтік желідегі жаңартылған хабарламасында: «Барлық оқушылар бірден оқшауланып, бірнеше секунд ішінде қауіпсіз жерге көшірілді», — деді.