Fransıada joǵary synyp oqýshylarynyń jappaı narazylyǵy tártipsizdikke ulasty: eldiń İshki ister mınıstrliginiń dereginshe, 625 adam ustaldy, dep habarlaıdy infohub.kz saıty.
Eki aptaǵa jýyq ýaqyt buryn bastalǵan narazylyq sharalary 356 oqý ornyn qamtydy. Túrli qalalarda narazylyq bildirýshiler kólikter men qoqys konteınerlerin órtep, mektep ǵımarattaryn talqandady. Muǵalimderge shabýyl jasaldy. Polıseılerge tas pen otshashý laqtyryldy.
83 polıseı men jandarm zardap shekti. Bilim mınıstrligi 119 oqýshy men mektep qyzmetkeriniń zardap shekkenin habarlaıdy.
Alǵashynda oqýshylar qarjylandyrýdyń jetispeýshiligine, muǵalimder tapshylyǵyna jáne mekteptegi bilim berý júıesindegi basqa da máselelerge qarsy shyqqan, alaıda narazylyq tez arada zorlyq-zombylyqqa ulasty.
Fransıa prezıdenti Emmanýel Makron jastardyń alańdaýshylyǵy ábden zańdy ekenin, biraq polıseılerge, muǵalimderge jáne jýrnalıserge qarsy zorlyq-zombylyqty eshnársemen aqtaýǵa bolmaıtynyn málimdedi. Ol polıseıler tarapynan bolǵan quqyqbuzýshylyqtar da zań boıynsha qýdalanýy tıis ekenin qosty.
Buǵan deıin Fransıany joǵary synyp oqýshylarynyń narazylyǵy qamtyǵany habarlanǵan — bir apta boıy oqýshylar oqý oryndaryn bógep jatyr. Aldyńǵy kúni 440 adamnyń ustalǵany aıtylǵan.