Fransıada joǵary synyp oqýshylarynyń narazylyq aksıalarynan kelgen shyǵyn 33–38 mıllıon eýroǵa baǵalandy, dep habarlaıdy infohub.kz saıty.
Eldiń úsh óńiri ákimdikteriniń málimetinshe, negizgi materıaldyq zalal bylaı bólindi: Overn — Rona — Alpi óńirinde 25–30 mıllıon eýro, Parıj óńirinde (Il-de-Frans) shamamen 7 mıllıon eýro, Grand-Est óńirinde 1 mıllıon eýroǵa jýyq.
Fransıanyń ishki ister mınıstri Loran Nýnes TF1 telearnasynyń efırinde apta basynan beri elde 5 myńnan astam adam ustalǵanyn, olardyń 85%-y kámeletke tolmaǵandar ekenin málimdedi.
Órt qoıý, urlyq jáne vandalızm oqıǵalary tirkelgen narazylyqtar 735 mektepti qamtydy, onyń ishinde 100-den astam lıseı talqandaldy. Bloktaý men qaqtyǵystarǵa baılanysty 400-ge jýyq oqý orny tolyǵymen qashyqtan oqytý rejımine kóshýge májbúr boldy.
Fransıanyń ıýstısıa mınıstri Djerald Darmanın narazylyqqa shyqqan jasóspirimderdiń ata-analaryn azamattyq jaýapkershilikke tartýǵa buıryq berdi. Bul shara olardy jóndeý jumystaryn birlesip tóleýge jáne oqý oryndaryna keltirilgen shyǵyndy tolyq óteýge mindetteıdi. Úkimet bul qarjylyq óndirip alý sharasyn jasóspirimderdi bas bostandyǵynan aıyrýdan góri tıimdirek dep sanaıdy.
Buǵan deıin «Kýrsıv» Fransıada oqýshylardyń jappaı narazylyǵy bilim berý júıesiniń nasharlaýyna, oqý júktemesiniń aýyrlyǵyna, muǵalimderdiń jetispeýine jáne synyptardyń tolyp ketýine baılanysty bastalǵanyn jazǵan bolatyn.