Fransıanyń opozısıasy prezıdent Emmanýel Makrondy eldi sharpyǵan iri orman órtteri kezinde gıdrosıklmen júrip jatqanyn beıneleıtin fotosýretter BAQ-ta jarıalanǵannan keıin qatty synǵa aldy, dep habarlaıdy infohub.kz saıty.
Memleket basshysy Bregansondaǵy jazǵy rezıdensıasynda demalyp jatyr. Jarıalanǵan sýretter solshyl partıalar ókilderiniń narazylyǵyn týdyrdy. Sosıalısik partıanyń jetekshisi Olıve For áleýmettik jelilerde: «Ystyqta, Fransıa órtenip jatqanda, fransýzdardyń bir bóligi demalysqa bara almaǵanda, prezıdent Bregansonda gıdrosıklde kóńil kóterýde», — dep jazdy.
«Ekologıa» jasyldar partıasynan prezıdenttikke úmitker Marın Tondele de Makrondy keleke etti. Ol X áleýmettik jelisinde ıronıamen: «Fransıa: bes ystyq tolqynynan myńdaǵan qurban, qýańshylyq jáne tarıhı órtter, aýyl sharýashylyǵy daǵdarysy, jumyssyzdyq pen kedeıliktiń ósýi, turǵyn úı daǵdarysy, orasan zor qaryz... Emmanýel Makron: "Meniń úlken gıdrosıklimniń qanshalyqty jyldam júretinin kórdińiz be?"», — dep jazdy. Tondele prezıdent «apokalıpsıstik jazdyń qyzǵan shaǵynda» óz demalysy týraly fotoreportaj uıymdastyryp jatqanyn, al fransýz órt sóndirýshileri resýrstar tapshylyǵyn sezinip jatqanyn atap ótti.
Komýnıstik partıadan senator Per Ýzýlá Makronnyń orny — órt sóndirýshilermen birge órtke qarsy kúreste kómektesý úshin órt sóndirý mashınasynda ekenin málimdedi.
Buǵan jaýap retinde prezıdent ákimshiligi sýretke túsirgen fotografqa materıal daıyndaý úshin «eshqandaı ruqsat etilgen qoljetimdilik» berilmegenin habarlady, dep jazady Parisien gazeti. Sondaı-aq, Makronnyń fotosýretteri toǵyz jyl boıy jyl saıyn jarıalanyp kele jatqanyna ókinish bildirdi.
Buǵan deıin Fransıada órtengen aýmaqtardyń aýdany 115 myń gektarǵa jetkeni habarlanǵan bolatyn.