Freedom Holding Corp. enshiles qurylymy sanalatyn Freedom Finance SPC kompanıasy AIX bırjasynda jyldyq syıaqy mólsherlemesi 8,5% bolatyn úsh jyldyq dollarlyq oblıgasıalardy ornalastyratynyn habarlady. Bir qaǵazdyń nomınaly $100 bolǵandyqtan, qural ınvestorlardyń keń aýqymyna qoljetimdi, al syıaqy toqsan saıyn tólenedi, dep jazady infohub.kz saıty.
Ornalastyrý 21 qyrkúıekke josparlanǵan. Aǵymdaǵy shyǵarylymnyń jalpy kólemi $500 mln dep baǵalanyp otyr. Bul — jalpy kólemi $1 mlrd bolatyn oblıgasıalyq baǵdarlama aıasyndaǵy ekinshi transh.
Buǵan deıin naýryzda Freedom Finance osyǵan uqsas baǵamen $400 mln somaǵa oblıgasıa shyǵaratynyn jarıalaǵan bolatyn. Ol kezde qaǵazdar ınvestısıa quraly retinde usynyldy: brokerlik shot ashqan soń, ınvestısıalaý bóliminde saýda tapsyrysyn jiberip, olardy Freedom Broker saýda alańynan satyp alýǵa bolatyn.
Aıta keteıik, oblıgasıa satyp alý dollarlyq jınaqty salym etýdiń bir jolyna aınalýy múmkin. Salystyrý úshin: jeke tulǵalarǵa arnalǵan valútalyq depozıtter boıynsha eń joǵary mólsherleme 1%-dy quraıdy. Qazaqstan qor bırjasynda dollarlyq oblıgasıalar 11–12%-ǵa deıingi kiristilikpen saýdalanady, alaıda qaǵazdyń eń tómengi baǵasy qymbatyraq bolýy múmkin ári satyp alý úshin broker qyzmetine júginý qajet.