AQSH-tyń Federaldyq saýda komısıasy (FTC) tutynýshylardyń jeke derekterine qarap baǵany jasyryn ózgertetin kompanıalarǵa qatysty jańa saıasat usyndy. Bul týraly infohub.kz saıty habarlaıdy.
FTC usynǵan qujatqa sáıkes, satyp alýshynyń tóleýge daıyn somasyn boljap, baǵany jekeleı ózgertetin satýshylar federaldy deńgeıde jaýapqa tartylýy múmkin. Komısıa tóraǵasy Endrú Fergúsonnyń aıtýynsha, tutynýshylar tizimdegi baǵany kórgende, onyń barlyǵyna birdeı qoljetimdi ekenin kútedi, alaıda keıbir satýshylar jeke derekter negizinde baǵany ózgertedi.
FTC bul máseleni burynnan baqylap keledi. 2025 jylǵy qańtardaǵy aldyn ala esepte agenttik azyq-túlik dúkenderi men kıim satatyn kompanıalar úshinshi tarap uıymdarynyń kómegimen tutynýshylardyń ornalasqan jeri, sholý tarıhy jáne vırtýaldy sebette taýardy qansha ýaqyt ustaǵanyna qarap baǵany jekelendiretinin anyqtaǵan. Mysaly, jańa ata-ana retinde profıldengen tutynýshyǵa izdeý nátıjeleriniń birinshi betinde qymbatyraq balalar termometrleri kórsetilýi múmkin.
Fergúson FTC-tiń jekelendirilgen baǵany tolyq tyıym salýǵa quqyǵy joq ekenin aıtady. Alaıda usynylyp otyrǵan saıasat boıynsha, bıznes sýbektileri jekelendirilgen baǵany qoldanatyn bolsa, bul týraly «aıqyn jáne kórneki túrde» habarlaýy jáne baǵany anyqtaý úshin qandaı derekterdi paıdalanatynyn kórsetýi tıis.
Saıasatta jekelendirilgen baǵany ashpaı qoldanatyn kompanıalar naryqtaǵy ádiletsiz nemese aldamshy áreketterge tyıym salatyn FTC Zańyn buzatyny kórsetilgen. Komısıa bul saıasat boıynsha 30 kún ishinde qoǵamdyq pikir jınaıdy.