50 жылдан астам уақыт бойы фторланған ағын суды ішу қарт адамдардың есте сақтау қабілеті мен танымдық функцияларының нашарлауына әкелмейді. Ирландиядағы Дублиндегі Тринити-колледж зерттеушілері осындай қорытындыға келді. Олар орташа жасы 65-тегі 2500-ге жуық адамның медициналық деректерін талдады, деп хабарлайды infohub.kz сайты.
Journal of Dental Research журналында жарияланған ғылыми жұмыстың нәтижелері заттың стандартты концентрациясы сақталған жағдайда суды фторлау бағдарламаларының миға зиянды әсері туралы алаңдаушылықты жоққа шығарады, деп жазады ScienceAlert ғылыми порталы.
Ғалымдар Ирландиядағы қартаюды зерттеудің лонгитюдтік бағдарламасының (TILDA) деректерін пайдаланды. Олар қатысушылардың тұрғылықты жерлерін 1964 жылы Ирландияда суды фторлаудың республикалық бағдарламасы енгізілген сәттен бастап ақыл-ой қабілетін бағалайтын екі түрлі тесттің нәтижелерімен салыстырды. Сыналушыларды жергілікті сумен жабдықтау жүйелеріндегі фтор мөлшеріне қарай әсер ету деңгейі төмен, орташа және жоғары топтарға бөлді. Салыстыру ондаған жылдар бойы алынған фтор көлемі мен танымдық денсаулық жағдайы арасында ешқандай статистикалық байланыс жоқ екенін көрсетті.
Жұмыстың жетекші авторы Винай Шарма өмірінің алғашқы бес жылында фторланған су ішкен 124 қатысушыдан тұратын топшада да жағымсыз әсер тіркелмегенін атап өтті, алайда іріктеме шағын болғандықтан бұл қорытынды сақтықты талап етеді. Зерттеу авторы Майкл Кроу фторлау тіс кариесінің алдын алудың ең тиімді жолдарының бірі болып қала беретінін, ал алынған деректер бұған дейінгі жұмыстарда сипатталған фтордың уытты артық мөлшері жағдайларынан өзгеше, оның жүйке жүйесі үшін қауіпсіздігін растайтынын атап өтті.