Jelide Gaı Rıchıdiń «Áıeli men ıt» atty jańa fılminiń tızer-treıleri paıda boldy. Krımınaldyq trıllerdegi basty rólderdi Benedıkt Kamberbech («Doktor Strendj», «Sherlok», «Imıtasıa oıyny»), Rozamýnd Paık («Joǵalǵan qyz», «Aldaý ıllúzıasy 3»), Djeıms Norton («Kishkentaı áıelder») jáne Entonı Hopkıns («Qozylardyń únsizdigi», «Gannıbal», «Djo Blekpen tanysyńyz») somdady, dep habarlaıdy infohub.kz saıty.
Sújettiń ortalyǵynda — yqpaldy brıtandyq Ferbenk otbasy. Otbasy basshysy qaıtys bolǵan soń mura men baılyqty baqylaý úshin kúres bastalady. Úlken aqsha, mártebe jáne bılik qaýipte tur. Birte-birte otbasylyq janjal satqyndyq pen kisi óltirýge toly oqıǵaǵa aınalady.
Tızerde sújettiń barlyq bólshekteri ázirge ashylmaıdy. Alaıda Kamberbechtiń keıipkeri osy kúrestiń ortasynda qalatyny belgili boldy. Rolıkke qaraǵanda, onyń keıipkeri qastandyqtan aman qalyp, kek alý úshin qaıta oralady. Bir epızodta akter beısbol taıaǵymen, endi birinde myltyqpen kórinedi.
Empire basylymy jazǵandaı, fılm tolyǵymen Gaı Rıchıdiń avtorlyq jobasyna aınaldy. Ol rejıser boldy jáne senarıdi ózi jazdy. Rıchı óziniń tanymal «Kartalar, aqsha, eki uńǵy» jáne «Úlken qarjy» fılmderin de osy formatta túsirgen.
«Áıeli men ıt» tolyǵymen Ulybrıtanıada túsirildi. Lokasıalardyń biri Sandaýn-Park ıpodromy boldy. At jarysy oqıǵada aıtarlyqtaı ról atqaryp, fılm atmosferasynyń bir bóligine aınalady.
Kamberbech, Paık jáne Hopkınsten bólek, kartınada Kosmo Djarvıs («Ledı Makbet», «İshinde») men Peddı Konsıdaın («Aıdahar úıi») de tústi.
«Áıeli men ıt» 2027 jyldyń aqpanynda kınoteatrlarda shyǵady.
Buǵan deıin Kursiv LifeStyle tanymal «Gangsterlend» serıalynyń ekinshi maýsymynyń alǵashqy tızer-treıleri men kadrlary jarıalanǵanyn jazǵan bolatyn. Basty keıipkerleri haos týdyryp, bılikti ustap qalýǵa tyrysatyn krımınaldyq dramanyń jalǵasy 18 qyrkúıekte shyǵady.