Galapagos arhıpelagyndaǵy Floreana aralyna shamamen eki ǵasyrdan keıin alyp galapagos tasbaqalary qaıta oraldy. Galapagos ulttyq parki dıreksıasynyń mamandary men ekologıalyq uıymdardyń ókilderi aralǵa 158 jas tasbaqa jiberdi, dep habarlaıdy infohub.kz saıty.
Bul túrdiń popýlásıasyn teńizshiler men kıt aýlaýshylar XIX ǵasyrdyń ortasynda tolyǵymen joıyp jibergen bolatyn. Alaıda ǵalymdar kórshiles Isabela aralyndaǵy Volf janartaýynyń mańynan tabylǵan gıbrıd daraqtar men kópjyldyq ósirý baǵdarlamasynyń arqasynda genetıkalyq jelini qalpyna keltire aldy.
Baýyrymen jorǵalaýshylardy tabıǵı ortasyna qaıtarý operasıasy reındjerler men eriktilerden asqan kúsh-jigerdi talap etti. Salmaǵy 13-22 kelige deıingi árbir tasbaqany arnaıy rúkzak-konteınerlerge salyp, janartaýlyq bederli jer men qalyń toǵaıdyń ishimen kóptegen shaqyrymdy jaıaý júrip ótti.
Ekologtar alyp tasbaqalardyń aral ekojúıesindegi róli erekshe ekenin atap ótedi. Olar aýmaqty aralap júrip, ósimdik tuqymdaryn taratady, ósimdik jamylǵysyn qalyptastyrady jáne basqa jergilikti túrlerdiń tirshiligine qajetti jaǵdaı jasaıdy. Ǵalymdar arhıpelagtyń tabıǵı tepe-teńdigin tolyq qalpyna keltirý úshin reıntrodýksıa baǵdarlamalaryn jalǵastyrmaq.