Ǵalym Áshimov Temirtaý ákimi qyzmetinen ketetinin málimdedi. Ol bul qyzmetti 2024 jyldyń qyrkúıek aıynan beri atqaryp keldi, dep habarlaıdy infohub.kz saıty.
Burynǵy ákim Instagram-daǵy paraqshasynda qala turǵyndaryna júginip, jumysyn aıaqtaıtynyn habarlady. Ol árbir turǵynǵa belsendi azamattyq ustanymy men ashyq dıalogy úshin erekshe alǵysyn bildirdi.
«Mundaı ashyq qarym-qatynas naqty máselelerdi kórýge jáne olardy birlesip sheshý joldaryn tabýǵa múmkindik berdi», — dedi Áshimov.
Ol Temirtaý men onyń turǵyndaryna qyzmet etý ózi úshin úlken mártebe bolǵanyn, al júreginiń bir bóligi metalýrgter qalasynda máńgi qalatynyn aıtty.
«Temirtaýdyń ıgiligi úshin birge eńbek etip, qalanyń damýyna úles qosqan barlyq azamattarǵa shyn júrekten alǵys bildiremin. Temirtaý qalasyna beıbitshilik, turaqtylyq, gúldený jáne jańa jetistikter tileımin. Ár úıde amandyq, molshylyq jáne erteńgi kúnge senimdilik ornasyn. Senimderińizge rahmet! Birlesken eńbekterińiz úshin alǵys aıtamyn!» — dep jazdy sheneýnik.