Qaraǵandy oblystyq sotynyń jańa tóraǵasy bolyp Ǵalym Kúlekeev taǵaıyndaldy. Ol buǵan deıin oblystyń azamattyq ister jónindegi sot alqasyn basqarǵan, dep habarlaıdy infohub.kz.
Joǵarǵy Sottyń tóraǵasy Aslambek Merǵalıev Qaraǵandy oblysy sýdıalar korpýsyna jańa basshyny tanystyrdy. İs-shara barysynda ol oblystyq sot tóraǵasy qyzmetin aıaqtap, zeınetkerlikke shyqqan Erden Áripovke alǵysyn bildirip, onyń oblystyń sot júıesin damytýǵa qosqan úlesin atap ótti. «Jańa basshyny tanystyra otyryp, Joǵarǵy Sot tóraǵasy Ǵalym Kúlekeevtiń sot júıesinde mol tájirıbesi baryn, sýdıalar qaýymy arasynda laıyqty bedelge ıe ekenin jáne kirshiksiz kásibı repýtasıasy bar ekenin atap ótti», — delingen habarlamada. Merǵalıev Kúlekeevtiń basshylyǵymen Qaraǵandy oblystyq soty sot tóreligin júzege asyrý sapasyn odan ári arttyryp, azamattar men uıymdardyń quqyqtaryn tıimdi qorǵap, sot bıligine qoǵam senimin nyǵaıtý jumysyn jalǵastyratynyna senim bildirdi.
Ǵalym Batyrbekuly Kúlekeev 1979 jyly Jambyl oblysynyń Qarataý qalasynda dúnıege kelgen. 2000 jyly Ál-Farabı atyndaǵy Qazaq ulttyq ýnıversıtetiniń zań fakúltetin, 2002 jyly M.H.Dýlatı atyndaǵy Taraz memlekettik ýnıversıtetiniń ekonomıka fakúltetin, al 2024 jyly osy oqý ornynyń zań fakúltetiniń magıstratýrasyn bitirgen. 2000–2007 jyldary sot júıesinde jáne memlekettik organdarda ártúrli laýazymdardy atqarǵan. 2007–2010 jyldary Astana qalasynyń Almaty aýdandyq sotynyń sýdıasy, 2010–2012 jyldary Jambyl oblysynyń Jambyl aýdandyq sotynyń tóraǵasy, 2012 jyldan 2024 jylǵa deıin Jambyl oblystyq sotynyń sýdıasy bolǵan. 2024 jyldan beri Qaraǵandy oblystyq sotynyń azamattyq ister jónindegi sot alqasynyń tóraǵasy qyzmetin atqaryp kelgen.