Syıaqynyń senimdiligi tómendep, jaǵdaıdy baqylaý álsiregen saıyn adam tezirek sheshim qabyldap, strategıasyn qarapaıymdata túsedi. Ortanyń kezdeısoqtyǵy men boljamsyzdyǵy adamdardyń josparlaýǵa tanymdyq resýrs jumsaýǵa daıyndyǵyna qalaı áser etetinin zerttegen ǵalymdar osyndaı tujyrymǵa keldi, dep habarlaıdy infohub.kz saıty.
Tıisti ǵylymı jumys Nature Communications jýrnalynda jarıalandy. Onyń negizinde AQSH-ta turatyn 300 eresek respondent qatysqan úsh onlaın-eksperıment jattyr.
Qatysýshylarǵa qazyna toly sandyqtardan turatyn vırtýaldy labırıntten ótý usynyldy. Onda eń kóp upaı jınaý úshin solǵa ne ońǵa burylýdy tańdaý kerek boldy. Ǵalymdar belgisizdiktiń úsh túrin modeldedi: aqparattyń senimdiligi (syıaqysy boljamsyz «qupıa» sandyqtardyń paıda bolýy), ortanyń ózgermeliligi (qozǵalys barysynda sandyq qundylyqtarynyń kezdeısoq aýysýy) jáne basqarylymdylyq (tańdalǵan baǵyttyń kerisinshe áreket etý yqtımaldyǵy). Matematıkalyq modelderdiń kómegimen zertteýshiler qatysýshylardyń alǵashqy sheshim qabyldaý ýaqytyn jáne tańdaý dáldigin taldady.
Nátıjeler birtutas úrdisti kórsetti: ortanyń boljamsyzdyǵy artqan saıyn qatysýshylar alǵashqy qadamdy áldeqaıda jyldam jasady, bul josparlaýǵa bólinetin ýaqyttyń qysqarǵanyn bildiredi. Kúrdeli yqtımaldyq esebiniń ornyna respondentter sheshim qabyldaýdyń qarapaıym strategıalaryna kóshti jáne marshrýttardyń yqtımal paıdasyndaǵy aıyrmashylyqty azyraq esepke aldy.
Ǵalymdar kezdeısoqtyq jaǵdaıynda adamdar tereń taldaýdan bas tartyp, qarapaıym algorıtmderge júginý arqyly tanymdyq resýrstaryn únemdeıdi degen qorytyndyǵa keldi.