Amerıkalyq zertteýshiler Kún júıesine jaqyn ǵalamsharlardaǵy tirshiliktiń damý áleýetin taldap, onda sanaly tirshilik ıeleriniń bolýy ekitalaı degen qorytyndyǵa keldi, dep habarlaıdy infohub.kz saıty.
SciTechDaily jazýynsha, Soltústik Arızona ýnıversıtetiniń mamandary bizdiń júıege jaqyn ǵalamshar júıelerin zerttegen. Olar ǵalamsharlardyń fotosıntez arqyly alatyn energıa kólemin eseptep, bul derekterdi Jerdiń evolúsıalyq tarıhymen salystyrǵan.
Nátıje jaqyn arada baılanys ornatýdy kútkender úshin kóńil kónshitpeıdi: bizdiń ǵalamshardan áldeqaıda eski bolsa da, jaryq energıasynyń jetispeýinen ekzoǵalamsharlar áli kúnge mıkroorganızmder deńgeıinde qalyp qoıýy múmkin.
Astrobıologtardyń baǵalaýynsha, belgili kórshi álemderdiń ishinen tek ekeýi — GJ 1061c jáne K2-3d — teorıalyq turǵydan bıologıalyq túrlerdiń damý deńgeıi boıynsha Jerden ozyp ketýi múmkin edi. Taǵy úsh ǵalamshar mezozoı dáýirimen shamalas kezeńde bolýy yqtımal.
Jumys avtorlary atap ótkendeı, eger ekzoǵalamsharlardaǵy tirshilik jerdegi zańdylyqtar boıynsha damysa, jaqyn mańdaǵy júıelerdiń kóbisi tek bakterıalarmen ǵana qonystanǵan. Bul adamzattyń óz júıemizdiń tóńireginde joǵary damyǵan ózge ǵalamsharlyq órkenıettermen jaqyn arada kezdesý yqtımaldyǵyn aıtarlyqtaı tómendetedi.