HBO strımıngtik servısi «Garrı Potter» serıalynyń jańa tızerin usyndy. Onda jas sıqyrshy alǵash ret Hogvartsqa kelip, fakúltetterge bólý rásiminen ótip, sıqyr mektebindegi jańa ómirin bastaıdy, dep habarlaıdy infohub.kz.
Bas róldi debútant Domınık Maklaflın somdady. Tızerde Garrı Grıffındor fakúltetine túsip, Ron Ýızlı men Germıona Greındjermen tanysady. Olarǵa sıqyrdyń alǵashqy qadamdaryn meńgerip qana qoımaı, fılosofıalyq tastyń qupıasyn ashý kerek bolady.
Joba avtorlary jankúıerlerge tanys birneshe kórinisti kórsetti. Garrı sypyrtqymen ushyp, kvıddıch oıynyna qatysady. Sonymen qatar, tızerde Hogvartstaǵy sabaqtardy, Úlken zaldy jáne mektep oqytýshylaryn kórýge bolady.
Kórermender Albýs Dambldor rólinde Djon Lıtgoýdy, Mınerva Makgonagall rólinde Djanet Maktırdi, Hagrıd rólinde Nık Frostty jáne Severýs Sneıp rólinde Paapa Essedti kóredi.
Ron Ýızlıdi Alastar Staýt, al Germıonany Arabella Stenton somdaıdy. Jas akterler brıtandyq balalar arasyndaǵy aýqymdy kastıngten keıin tańdaldy.
Birinshi maýsym «Garrı Potter jáne fılosofıalyq tas» kitabyndaǵy oqıǵalarǵa arnalady. HBO Djoan Roýlıngtiń barlyq jeti kitabyn ekrandaýdy josparlap otyr.
Serıaldyń tusaýy 2026 jyldyń 25 jeltoqsanynda ótedi. HBO jobany ekinshi maýsymǵa deıin uzartqan.
Buǵan deıin Kursiv LifeStyle Rýpert Grınttiń Garrı Potter týraly sońǵy fılm shyqqannan 15 jyl ótken soń Ron Ýızlı rólin qaıta somdaıtynyn jazǵan. Akter Nú-Iorktegi «Garrı Potter jáne qarǵys atqan bala» brodveı qoıylymyna qosylady.