Garrı Potter týraly jańa serıaldyń túsirilimi brıtandyq Latımer aýylynyń turǵyndary úshin kólik keptelisine aınaldy: adamdar uzaq aınalma joldardy paıdalanýǵa májbúr boldy, dep habarlaıdy infohub.kz saıty.
HBO telearnasynyń (Warner Bros. Discovery kompanıasyna tıesili áıgili amerıkandyq kabeldik jáne spýtnıktik telearna — red. eskertpesi) serıalynyń ekinshi maýsymyn túsirý jumystary Anglıanyń Bakıngemshır graftyǵynda ornalasqan Latımerde júrip jatyr.
Joldardyń jabylýyna baılanysty jergilikti turǵyndardyń bir bóligi 11 mıl (shamamen 18 km — red. eskertpesi) aınalma jol júrýge májbúr boldy, bul jol júrý ýaqytyn 20 mınýttan astamǵa uzartty.
Aıta ketý kerek, shekteýler úsh kún boıy kúshinde boldy. Seısenbide saǵat 7:00-den 19:00-ge deıin kirý tek jedel qyzmetterge ruqsat etildi, al dúısenbi men sársenbide tıisti ruqsaty bar turǵyndarǵa júrýge ruqsat berildi.
Latımer turǵyndarynyń biri optıkalyq dúkenge baratyn qysqa sapardyń ózine 25 mınýt ýaqyt alǵanyn aıtty.
«Munda ártúrli fılmder túsirildi — bári qalypty boldy. Menińshe, Warner Bros tym alys ketti. Aýyldaǵy ómir tolyǵymen derlik toqtap qaldy. Tipti jaıaý júrginshiler joldary da jabyldy», — dedi ol.
Bakıngemshır graftyǵynyń keńesi óz kezeginde túsirilimniń jergilikti qaýymdastyqqa ekonomıkalyq paıda ákeletinin málimdedi. Keńes basshysynyń orynbasary Tomas Brým joldyń ýaqytsha jabylýy keńester men jaǵdaıdy baǵalaýdan keıin kelisilgenin atap ótti.
«Jabý túsirilimniń qaýipsiz ótýi úshin maquldandy. Turǵyndardyń kirýin saqtaý úshin aınalma marshrýttar jumys isteıdi, al barlyq aıtylǵan alańdaýshylyqtar baǵalaý barysynda qaraldy», — dedi ol.
Aıtpaqshy, «Garrı Potter men fılosof tasy» kitabynyń jelisi boıynsha HBO-nyń birinshi serıaly 25 jeltoqsanda shyǵýy tıis.