Ortalyq Azıadan shyqqan bilim berý jobasy alǵash ret Garvard bıznes mektebiniń bıznes-keısine aınaldy. Zertteý ortalyǵynda IQanat jobasy tur. Bul týraly joba ókilderi málimdedi... dep habarlaıdy infohub.kz.
«Álemdegi úzdik bıznes mektepteriniń biri – Harvard Business School – jobany óziniń oqý keıs-bazasyna engizgende, bul onyń aldynda jaı ǵana shabyttandyratyn oqıǵa emes, álemniń túrli elderindegi stýdentter men zertteýshiler úshin mańyzdy, jumys isteıtin model turǵanyn bildiredi. Osyndaı taldaýdyń ortalyǵynda IQanat tur, al biz úshin Qazaqstanda jasalǵan tájirıbeniń el sheginen tys jerlerde qyzyǵýshylyq týdyrýy erekshe mańyzdy», – dep atap ótti IQanat atqarýshy dırektory Azamat Ashamaev.
Keıs avtory, profesor Borıs Groısberg jaqynda AQSH-tan Qazaqstanǵa ushyp keldi. Al 20 tamyzda Borovoıdegi IQanat mektebinde keıstiń resmı tusaýkeserin ótkizdi. Borıs Groısberg oqýshylarmen, túlektermen, muǵalimdermen, qamqorshylarmen jáne qor komandasymen – ıaǵnı keıstiń naqty keıipkerlerimen sesıa ótkizdi.
Zertteýde IQanat eldiń shalǵaı aýyldaryndaǵy balalardyń akademıalyq áleýetin qalaı anyqtaıtyny, olarǵa bilim alýǵa kómektesetini jáne qarjylyq turaqty biregeı modeldi damytatyny baıandalady. Jobanyń qamqorshylyq júıesi qaıyrymdylyqty bir rettik áreket emes, uzaq merzimdi qoldaýǵa aınaldyrady. Qazir IQanat-ty 260-tan astam mesenat qoldaıdy, al kásipkerler ony damytýǵa 8 jyldan astam ýaqyt qatysyp keledi.
IQanat olımpıadasynan jyl saıyn ondaǵan myń aýyl balasy ótedi, bıyl 60 myńnan astam. Olardyń arasynda sapaly bilim alý múmkindigi shekteýli, áleýmettik osal otbasylardan shyqqan balalar da az emes. Jobanyń basty ereksheligi – «jeńdi – óttiń, jeńildi – shyqtyń» qaǵıdatynan bas tartý: tipti IQanat mektep-ınternatynda oqýǵa grant almaǵan oqýshylar da tálimgerlik jáne bilim berý qoldaýy arqyly ekojúıede qalady. Garvard úshin IQanat modeliniń ondaǵan jyldar boıy jumys isteý jáne ózin-ózi jańǵyrtý qabileti erekshe qyzyqty. Onyń bir mysaly – Peer-to-Peer baǵdarlamasy: aýyldardaǵy myqty joǵary synyp oqýshylary aýyldyń kishi synyp oqýshylaryna tútor jáne muǵalim bolady. Osylaısha qoldaý alǵan bala ózi kelesi urpaqqa kómektese bastaıdy, jaqsylyqty ári qaraı jalǵastyrady. Qor baǵdarlamalarynyń nátıjeleri boıynsha, joba túlekteriniń 94%-y grantqa joǵary oqý oryndaryna túsip, álemniń 19 elinde bilim alady.
Keıstiń tusaýkeserine IQanat mektebine Qazaqstandaǵy IýNISEF ókili Rashed Mýstafa Sarvar da keldi. Ol IQanat balalardyń bilim sapasy men adamı kapıtaldy damytýdyń joǵary standartyn belgileıtinin, al joba jınaqtaǵan tájirıbe basqa elderde beıimdeý men taratýǵa laıyq ekenin atap ótti.
IQanat akademıalyq dırektory Zýhra Shegenova: «Garvard úshin IQanat – Ortalyq Azıadan shyqqan sırek mysal, ony áleýmettik mısıa turǵysynan ǵana emes, áleýmettik ınvestısıalardyń qaıtarymy turǵysynan da qarastyrady. Bul IQanat-ty aýmaqtyq teńsizdik, aýyldardaǵy kadr tapshylyǵy jáne sapaly bilimge qoljetimdiliktiń shekteýliligi sıaqty uqsas máseleleri bar elder qoldana alatyn modelge aınaldyrady», – dep atap ótti.
IQanat – aýyl balalarynyń ómirlik traektorıasyn ózgertýdi qalaıtyn qazaqstandyq kásipkerlerdiń áleýmettik-bilim berý jobasy. Ol olarǵa bilim men motıvasıa arqyly kúshtirek bastapqy múmkindikter beredi.