Gollıvýdtyń burynǵy prodúseri Garvı Vaınshteın burynǵy kómekshisine jynystyq qylmys jasaǵany úshin 15 jylǵa bas bostandyǵynan aıyryldy. Bul úkimdi Nú-Iork soty shyǵardy, dep habarlaıdy infohub.kz saıty.
Sot otyrysynda zardap shegýshi Mırıam Heılı óziniń jábirlenýshi retindegi málimdemesin oqyp, basynan keshken oqıǵanyń «ómirime jáne qaýipsizdik sezimime qalpyna kelmeıtindeı aýyr áser etkenin» aıtty.
Vaınshteın sot zalyna múgedekter arbasymen keldi. Ol aıyptaýlardy joqqa shyǵarǵanymen, «áreketterimmen kimdi bolsa da renjitken bolsam, keshirim suraımyn» dedi.
Ol Nú-Iorkte zorlaý men qorlyq jasady degen aıyptaýlar boıynsha úsh sot prosesine qatysyp, alty jyl túrmede ótkizdi. Los-Andjeleste de jynystyq qylmystar úshin bólek sottalǵan.
Alǵashynda Mırıam Heılıge qatysty is boıynsha 2020 jyly sottalyp, úkim shyǵarylǵan edi. Biraq 2024 jyly Nú-Iorktiń joǵarǵy soty úkimdi kúshinen aıyryp, Vaınshteın ádil sotqa qol jetkize almady dep sheshti. Keıin is qaıta qaralyp, ol ótken jyly Heılıge qatysty jynystyq sıpattaǵy qylmystyq áreket jasady degen bir aıyp boıynsha qaıta sottaldy.
2020 jylǵy sot prosesinde úsh áıel — Heılı, aktrısa Djessıka Mann jáne model Kaıa Sokola — kýálik bergen.
Heılı 2006 jyly Vaınshteın oǵan Manhettendegi páteriniń jatyn bólmesinde shabýyl jasaǵanyn aıtyp kýálik berdi, al alqabıler ony sol aıyp boıynsha kináli dep tapty.
«Men ózimdi qorǵaýym kerek, shyndyqty qorǵaýym kerek dep oıladym», — dedi ol kýálik berý týraly sheshimi jóninde Bı-bı-sıge.
Alaıda sol sot prosesinde alqabıler ony Sokolaǵa shabýyl jasady degen aıyp boıynsha kinásiz dep tapty. Mannǵa qatysty qosymsha zorlaý aıyby boıynsha úkim shyǵarylmady.