Gaıana bıligi AQSH-tan deportasıalanǵan alǵashqy alty adamdy qabyldaǵanyn habarlady. Bul — Tramp ákimshiliginiń úshinshi elderge deportasıalaý júıesi aıasyndaǵy alǵashqy top. Bul týraly infohub.kz saıty habarlaıdy.
Gaıananyń syrtqy ister hatshysy Robert Persoýdtyń aıtýynsha, alty azamat — Kýba men Aýǵanstan azamattary — juma kúni elge kelgen. Olar Gaıana bıliginiń tekserýinen ótip, qylmystyq jaǵdaılary joq ekeni anyqtalǵan. Persoýd olardyń AQSH-tan negizinen ımıgrasıalyq máselelerge baılanysty shyǵarylǵanyn qosymsha aıtty.
Onyń aıtýynsha, Gaıana ákimshiligi bul azamattardy qabyldaý týraly kelisimge birneshe aılyq kelissózderden keıin qol jetkizgen. Ol Associated Press agenttigine «AQSh tarapynan qosymsha ótinish túsken joq» dep málimdedi. Kelisim bir jylǵa jaramdy jáne turaqty qonystandyrýdy bildirmeıdi, dedi ol. «Erikti qaıtarý baǵdarlamasy» aıasynda Gaıanaǵa kóshirilgender elde bolǵan kezde ımıgrasıalyq mártebesiniń anyqtalýyn kútedi. Olar aqyr sońynda óz elderine qaıta oralýy nemese basqa jerge kóshirilýi múmkin.
Gaıana bıliginiń málimetinshe, baǵdarlamany iske asyrýǵa BUU-nyń Halyqaralyq kóshi-qon uıymy jaýapty. Úkimet turý nemese qoldaý shyǵyndaryn kótermeıdi. Gaıana — 15 músheli Karıb qaýymdastyǵynyń negizin qalaýshy elderdiń biri. Ol AQSH-tan deportasıalanǵan shaǵyn toptardy qabyldaǵan birneshe múshe elderdiń sońǵysy. Basqalarynyń qatarynda Sent-Kıts jáne Nevıs, Belız jáne Sent-Lúsıa bar. Sońǵysy alǵashqy tobyn osy aptada qabyldaýy tıis edi, dep habarlady sheneýnikter.