Qaratal aýylynda quny 768 mln teńgeden asatyn gaz qubyrynyń qurylysy sot talqysyna ushyrady: tapsyrys berýshi oryndalǵan jumystar men jobalyq qujattama arasynda sáıkessizdikterdi anyqtady. Sot merdiger uıymdy ondaǵan mıllıon teńgeni búdjetke qaıtarýǵa mindettedi, al apelásıa sheshimdi ózgerissiz qaldyrdy, dep habarlaıdy infohub.kz.
Jetisý oblysynyń energetıka jáne turǵyn úı-kommýnaldyq sharýashylyq basqarmasy Almaty oblysy Eskeldi aýdany Qaratal aýylynda gaz qubyry men gaz taratý jelilerin salýǵa JSHS-men memlekettik satyp alý shartyn jasasty. Jobanyń jalpy quny 768 mln teńgeden asty.
Tapsyrys berýshiniń bastamasymen qurylys-tehnıkalyq zertteý júrgizildi, ol naqty oryndalǵan jumystar kólemi men jobalyq-smetalyq qujattama arasyndaǵy sáıkessizdikterdi anyqtady. Atap aıtqanda, gaz qubyry tirekteriniń irgetasyn ornatý kezinde merdiger jobada kózdelgennen áldeqaıda az kólemde beton paıdalanǵan.
Mamandandyrylǵan aýdanaralyq ekonomıkalyq sot mán-jaıdy jan-jaqty zerdeleý úshin sarapshylardyń qorytyndylaryn zerttep, qurylys alańynda obektini qosymsha tekserýmen shyǵys otyrysyn ótkizdi. Sot merdigerdiń josparlanǵan kólemde jumystardyń oryndalǵanyn rastaı almaǵany, al talapkerdiń dálelderi sharttyq mindettemelerdiń bir bóliginiń oryndalmaǵanyn kórsetken degen qorytyndyǵa keldi.
Birinshi saty sot talapty ishinara qanaǵattandyrdy: merdiger uıymnan respýblıkalyq búdjetke 45,9 mln teńge jáne 1,4 mln teńge memlekettik baj óndirildi. Kompanıany memlekettik satyp alýdyń adal nıetti emes qatysýshysy dep taný týraly talap qabyldanbady, óıtkeni mundaı málimdeme úshin jaǵdaılar shart oryndalǵannan keıin týyndady.
JSHS apelásıalyq shaǵym berdi, biraq Jambyl oblystyq sotynyń azamattyq ister jónindegi sot alqasy sheshimdi ózgertýge negiz tappaı, ony kúshinde qaldyrdy. Sot aktileri zańdy kúshine endi.