Reseı Federasıasyndaǵy eń iri munaı-hımıa keshenderiniń biri «Gazpromneftehım Salavat» dron shabýyly saldarynan munaı men gaz kondensatyn óńdeýdi toqtatty, dep habarlaıdy infohub.kz.
Reuters agenttiginiń eki salalyq derekkózge silteme jasaýynsha, óńdeý 14 shildeden bastap toqtatylǵan. Buǵan deıin Bashqurtstan basshysy Radı Habırov Salavattaǵy keshen aýmaǵynda dron soqqylarynan qubyr jáne kabel estakadalary zaqymdalǵanyn, sondaı-aq órt oshaqtary paıda bolǵanyn habarlady.
Reuters derekkózderiniń málimetinshe, kásiporynda bastapqy óńdeýdiń eki qondyrǵysy — AVT-6 jáne AVT-4 isten shyǵyp, toqtatylǵan. Sonymen qatar, keıbir ekinshilik qondyrǵylar men seharalyq komýnıkasıalar zaqymdanǵan. AVT-6 qondyrǵysy táýligine 17,1 myń tonna munaı men gaz kondensaty qospasyn óńdeı alady, bul zaýyt qýatynyń shamamen 60% quraıdy. AVT-4 qalǵan 40% qýatty — táýligine shamamen 11,4 myń tonnany qamtamasyz etedi.
Derekkózderdiń baǵalaýynsha, shabýyldyń zardaptaryn joıýǵa jáne óńdeýdi ishinara qalpyna keltirýge birneshe aptadan birneshe aıǵa deıin ýaqyt ketýi múmkin. «Gazpromneftehım Salavat» — Reseıdegi kómirsýtek shıkizatyn tolyq sıklmen óńdeıtin iri munaı-hımıa keshenderiniń biri. Kásiporyn benzın, dızel otyny, kerosın, suıytylǵan gazdar, polıetılen, akrıl qyshqyly, amıak, karbamıd jáne basqa da ónimder shyǵarady.
Salalyq derekkózderdiń málimetinshe, 2024 jyly zaýyt 7,2 mln tonna munaı shıkizatyn óńdegen, bul Reseıdegi jalpy óńdeý kóleminiń shamamen 2,7% quraıdy. Zaýyt sonymen qatar 1,5 mln tonna avtobenzın, 2,5 mln tonna dızel otyny jáne 0,7 mln tonna mazýt óndirgen. «Gazpromneftehım Salavattyń» ıesi — «Gazprom dobycha Tambeı» («Gazprom» men «Rýsgazdobychanyń» birlesken kásiporny).