Birikken Arab Ámirlikteriniń Bas prokýrory Hamad Saıf ál-Shamsı Flydubai áýekompanıasynyń ushaǵyndaǵy tótenshe jaǵdaı terakt áreketi retinde saralanǵanyn málimdedi, dep habarlaıdy infohub.kz saıty.
BAÁ Bas prokýrorynyń aıtýynsha, Flydubai reısindegi oqıǵany tergeý ushqysh kómekshisiniń terorıstik operasıa jasaý áreketin anyqtaǵan. Ushý barysynda ekinshi ushqysh kabınada qolbasshyǵa qutqarý baltasymen shabýyl jasap, ushaqty basqarýdy basyp alýǵa tyrysqan.
Tergeý jalǵasýda, dedi Hamad Saıf ál-Shamsı. Tergeýshiler bolǵan jaǵdaıdyń mán-jaıyn, sebepterin jáne oqıǵaǵa qatysty baılanystardy anyqtap, tehnıkalyq zertteýler júrgizip, zattaı jáne sıfrlyq dáleldemelerdi zerdeleýde. Qorytyndy nátıjeler qajetti rásimder aıaqtalǵannan keıin jarıalanady.
Otyzynshy qyrkúıekte buqaralyq aqparat quraldarynda Boeing 737 jolaýshylar ushaǵy Saýd Arabıasy ústinen burylys kezinde apattyq jaǵdaı sıgnalyn bergeni týraly málimetter paıda boldy. Ol ushaqty urlaýdy nemese zańsyz aralasýdy bildiretin 7500 kodyn jibergen. Izraıl Áskerı-áýe kúshteriniń ıstrebıtelderi ushaqqa qaraı kóterilgen.
Keıin ushaqtyń Saýd Arabıasyna qonǵany belgili boldy. Dýbaı — Tel-Avıv reısinde ushqyshtar arasynda ushaq bortynda tóbeles bolǵany habarlandy. Jaqynda ushaqtan alǵashqy fotosýretter men beınejazbalar paıda boldy.
Sondaı-aq BAQ Ýkraına men Reseıden kelgen ushqyshtar jolaýshy retinde ushyp, Flydubai ushaǵyn basqarýdy basyp alǵanyn habarlady. Keıinirek zardap shekken ushqysh Úndistan azamaty Smıt Machchhar bolǵany belgili boldy.
Odan ári Flydubai áýekompanıasy oqıǵany tergeý aıaqtalǵansha Izraılge jáne keri baǵyttaǵy reısterdi toqtatty.
Izraıl qorǵanys mınıstri Israel Kas Flydubai ushaǵynyń bortyndaǵy oqıǵany terakt áreketi dep atady. Al Iranda Izraıl AQSH-ty qaqtyǵysqa qaıtarý úshin Flydubai ushaǵymen tótenshe jaǵdaıdy josparlady dep málimdeýde.
Sondaı-aq terakt jasaýǵa kúdikti Flydubai áýekompanıasy ushaǵynyń ushqyshynyń aty-jóni men azamattyǵy belgili boldy.