2025 jyldyń qorytyndysy boıynsha jer qoınaýyn paıdalanýshy Geo.kz kompanıasynyń taza paıdasy 584,7 mln teńgeni qurady, bul aldyńǵy jylmen salystyrǵanda eki esege jýyq ósken (298,8 mln teńge). Qarjylyq eseptilikke sáıkes, kompanıanyń negizgi aksıoneri — belgili mıllıoner Edýard Ogaıdyń uly Vladıslav Ogaı, dep habarlaıdy infohub.kz.
Geo.kz kompanıasynyń esepti kezeńdegi túsimi 2,9 mlrd teńgeden 3,8 mlrd teńgege deıin ósti. Jalpy paıda 864,7 mln teńgeden 1,49 mlrd teńgege, al operasıalyq paıda 557,9 mln teńgeden 1,14 mlrd teńgege deıin artty.
Sonymen qatar, kompanıanyń ákimshilik shyǵyndary 306,8 mln teńgeden 349,2 mln teńgege, al basqa da shyǵyndar 82,9 mln teńgeden 328,2 mln teńgege ósti.
Nátıjesinde salyq salynǵanǵa deıingi paıda bir jyl burynǵy 397,3 mln teńgemen salystyrǵanda 766,4 mln teńgege jetti. Korporatıvtik tabys salyǵyn tólegennen keıin taza paıda 584,7 mln teńgeni qurady.
Eseptilikke sáıkes, Geo.kz Óskemende tirkelgen. Kompanıa jer qoınaýyn paıdalaný salasyndaǵy operasıalarmen, onyń ishinde geologıalyq barlaý, izdeý jáne baǵalaý jumystarynyń jobalaryn ázirleý, sondaı-aq ken oryndaryna geologıalyq-ekonomıkalyq taldaý jasaýmen aınalysady.
Kompanıa Shyǵys Qazaqstan oblysyndaǵy Bala-Úrlek jáne Predgornoe ýchaskelerinde qatty paıdaly qazbalardy barlaýǵa lısenzıalarǵa, sondaı-aq Azamat-Grıgorevskı ýchaskesinde mys quramdy kenderdi barlaýǵa kelisimshartqa ıe.
2025 jyldyń sońyna qaraı Geo.kz kompanıasynyń eń iri qatysýshysy — 70% úlesimen Vladıslav Ogaı. Taǵy 15% Dmıtrı Alekseıchýkke jáne 15% Rýslan Oralǵa tıesili boldy.
Vladıslavtyń ákesi Edýard Ogaı Forbes nusqasy boıynsha Qazaqstannyń eń baı bıznesmenderi reıtıńinde 15-orynda tur. Onyń baılyǵy 650 mln dollarǵa baǵalanady. 2025 jyly kásipker 11-orynda bolyp, 761 mln dollarǵa ıe bolǵan edi.