Grýzıada mekteptegi atys kezinde uly qoldanǵan tapanshany syıǵa tartqan er adam 15 jylǵa bas bostandyǵynan aıyrylyp, jańa sot otyrysyn ótkizýdi talap etti. Bul týraly infohub.kz habarlady.
Kolın Greı bıylǵy jyly ekinshi dárejeli kisi óltirý jáne abaısyzda kisi óltirý boıynsha kináli dep tanylǵan bolatyn. Sársenbidegi sot qujatynda onyń advokattary alqabılerdiń kináli degen úkimi dáleldemelermen rastalmaǵanyn jáne "zańǵa, ádilettilik pen teńdik qaǵıdattaryna qaıshy keletinin" alǵa tartty.
2024 jylǵy 4 qyrkúıekte Apalachı joǵary mektebinde bolǵan atysta eki oqýshy men eki muǵalim qaza tapty. Onyń uly Kolt Greı ómir boıyna bas bostandyǵynan aıyrylyp, keshirim jasaý quqyǵynsyz sottaldy.
Kolın Greı — balalary atys oqıǵasyna qatysy bar dep aıyptalǵannan keıin qylmystyq jaýapkershilikke tartylǵan birneshe amerıkandyq ata-ananyń biri. Prokýrorlardyń aıtýynsha, Kolın Greı ulyna jartylaı avtomatty vıntovkany Rojdestvo syılyǵy retinde, oq-dárilermen jáne basqa da atys quraldarymen birge bergen.
Naýryzda alqabıler Kolın Greıdi eki 14 jastaǵy oqýshy — Meıson Shermerhorn men Krıstıan Angýlonyń ólimine ákelgen ekinshi dárejeli kisi óltirýde kináli dep tapty. Grýzıa zańy boıynsha, ekinshi dárejeli kisi óltirý — balaǵa qatygezdik jasaý qylmysy arqyly balanyń ólimine ákelý. Sondaı-aq Greı 39 jastaǵy muǵalim Rıchard Aspınvoll men 53 jastaǵy Krıstına Irımıeniń ólimine ákelgen abaısyzda kisi óltirýde kináli dep tanyldy. Mektep Atlantadan 45 mıl (70 shaqyrym) soltústik-shyǵysta ornalasqan.