Германияның қаржы орталығы саналатын Франкфуртта сенбі күні кешке тұрмыс қымбаттауына қарсы өткен жаппай наразылық акциялары зорлық-зомбылыққа ұласты. Тәртіпсіздікке қатысқандар дүкендерді тонады, ал полициямен қақтығыстар осы қалада және елдің басқа да қалаларында болды деп хабарлайды infohub.kz сайты.
Франкфурттан бөлек, Берлин, Кёльн және Гамбургте де зорлық-зомбылық оқиғалары тіркелді. Полиция қызметкерлерінің айтуынша, құтқару қызметінің мамандарына отшашу, тас және бөтелке лақтырған наразыларды тарату үшін су атқыш қондырғылар қолданылған.
Бұған дейін мыңдаған адам «Gen Z regelt» — «Z ұрпағы жауапкершілікті алады» деген ұранмен әрекет ететін науқан тобы ұйымдастырған шерулерге қосылған. Олар мектептердің қаржыландырылуының жеткіліксіздігіне, тұрмыс қымбаттауына, мемлекеттік шығыстардың қысқартылуына және әскери қызметке қарсы наразылық білдірді.
Германиядағы толқулар Франциядағы ұқсас жастар наразылығынан кейін басталды. Онда сенбі күні 320 мыңнан астам адам шеруге шыққан.
Франкфурттың негізгі сауда көшесінің үлкен бөлігін полиция жауып тастағанын Франс Пресс агенттігі хабарлады. Полиция өкілінің сөзінше, қалада көптеген адам ұсталған.
Франкфурт, Мюнхен және Берлин әкімшіліктері наразылардың саны 18 мыңға жеткенін мәлімдеді. Бұл ұйымдастырушылардың өз сайтында болжаған санының шамамен жартысы.
«Gen Z regelt» өкілі Лина Фридрих шерулер «соғыс пен мәжбүрлеу үшін емес, бейбітшілік пен бостандық үшін күрес» мақсатында өткенін айтты.
«Біз үшін ең бастысы — денсаулық сақтау және білім беру жүйелерін жақсырақ қолдау. Біз міндетті әскери қызметке қарсымыз және салмақты әділ бөлуді жақтаймыз», — деді ол.