Bıll jáne Melında Geıts qory damýshy elder men kedeı aımaqtarda jasandy ıntellekt tehnologıalaryna qoljetimdilikti keńeıtýge 1,27 mıllıard dollar bóletinin habarlady, dep jazady infohub.kz saıty.
The Straits Times basylymynyń jazýynsha, ozyq ázirlemelerge shekteýli qoljetimdilik baı jáne kedeı memleketter arasyndaǵy sıfrlyq ári ekonomıkalyq alshaqtyqty odan ári ulǵaıtý qaýpin tóndiredi.
Bólingen qarjy negizgi áleýmettik salalarǵa jumsalady. 400 mıllıon dollarǵa jýyǵy densaýlyq saqtaý salasyndaǵy jobalarǵa, sonyń ishinde medısına qyzmetkerlerin qoldaýǵa jáne vaksınalardy ázirleýdi jedeldetýge arnalǵan jasandy ıntellekt júıelerine baǵyttalady. Dál sonsha qarajat muǵalimderge arnalǵan bilim berý platformalaryna bólinedi. Taǵy 100 mıllıon dollar shamasynda agrarlyq sektordy qoldaýǵa jáne aýyl sharýashylyǵyn ońtaılandyrýǵa jumsalady.
Tildik kedergige erekshe kóńil bólinedi: 100 mıllıon dollar shamasyndaǵy qarjy Afrıka men basqa óńirlerdiń sırek kezdesetin jáne jergilikti tilderi úshin oqytý derekter jınaqtaryn jasaýǵa jumsalady.
Osy bastamalardy júzege asyrý úshin qor OpenAI, Anthropic, Google jáne Microsoft sıaqty jetekshi tehnologıalyq kompanıalarmen yntymaqtasady.