Aýstrıa úkimeti Adolf Gıtlerdiń týǵan úıin polısıa bólimshesine aınaldyrdy. 2017 jyly satyp alynǵan úıdi qaıta qurý jumystary 2019 jyly jarıalanǵan edi. Jóndeýge 20 mıllıon eýro (22,8 mıllıon dollar) jumsalypty. 2026 jylǵy 22 shildede ashylǵan jańa bólimsheniń maqsaty – neonasısterdiń úıdi qasıetti oryn sanap zıarat etýine jol bermeý, deıdi infohub.kz.
Aýdandyq jáne jergilikti polısıa qyzmetkerleri osy ǵımaratta ornalasady. Ashylý saltanatynda qala ákimi Iohannes Vaıdbaher: «Jergilikti qaýym tarıhpen betpe-bet kelip, jaýapkershilikti moıyndaıtynyn kórsetýdi úmit etemin. Polısıa bólimshesiniń ashylýy talqylaýlarǵa aıqyndyq ákelip, Braýnaý turǵyndaryna tynyshtyq syılaıdy dep senemin», — dedi. Saltanatqa ishki ister mınıstri Gerhard Karner de qatysty. Frans Pres agenttiginiń málimetinshe, úı aýlasynda orkestr oınap turǵan kezde 100-ge jýyq adam, onyń 30-ǵa jýyǵy formaly polıseı bolǵan, alaıda jergilikti turǵyndar kóp kelmegen.
Aýstrıa İshki ister mınıstrliginiń tarıh bóliminiń basshysy Stefan Mlsoh ǵımaratty aralap júrip: «Maqsatymyz — Adolf Gıtlermen kez kelgen baılanysty úzý, onyń osylaısha qupıalyǵyn joıý», — dedi. Nasıster Gıtlerdiń tulǵa kúltin qoldaǵan; buryn «Fúrerdiń týǵan úıi» óner murajaıy bolǵan. Gıtler 1889 jyldyń 20 sáýirinde osy úıde dúnıege kelgen, otbasy birneshe aptadan keıin kóship ketken. Qazir ótip bara jatqandar jıi sýretke túsedi, biraq olardyń Gıtlerge kózqarasy belgisiz. Jergilikti sheneýnikterdiń aıtýynsha, kelýshilerge qatysty «oqshaýlanǵan oqıǵalar» ǵana tirkeledi, bul burynǵydan da az.
Degenmen, synshylar ǵımarattyń fýnksıasyn ózgertý onyń tarıhy men nasıstik kóshbasshymen baılanysyn joıa almaıdy dep esepteıdi. Maýthaýzen komıteti men Násilshildik pen ońshyl ekstremızmge qarsy jeliniń ókili Robert Aıter: «Álem tarıhtaǵy eń iri jappaı qyrǵynshynyń qaıda týǵanyn umytpaıdy. Ýıkıpedıa da jazbalaryn ózgertpeıdi. Neonasısterdiń Braýnaýǵa zıaraty azaımaıdy», — dedi. Jobaǵa qoǵamdyq pikir týraly suraqqa mer Vaıdbaher Reıterge: «Jalpy, Braýnaý turǵyndary muny qabyldap, úırenip ketti dep oılaımyn», — dep jaýap berdi.
Keıbir turǵyndar ǵımarattyń jańa maqsatyna rıza emes. 74 jastaǵy Iren: «Men basqa nárse istegenin qalaıtyn edim, biraq ne isteısiń. Qaıyrymdylyq uıymy bolǵanyn qalaıtynmyn», — dedi. Vaıdbaher ǵımaratty qaıyrymdylyq nemese resmı ákimshilik maqsatta paıdalanýdy usynǵan komısıa múshesi bolǵan. Aqyrynda qaıyrymdylyq uıymy halyq úshin tym qoljetimdi bolady degen pikir basym tústi. Ǵımarattyń trotýarynda Maýthaýzen konslagerinen ákelingen «Eshqashan fashızmge jol bermeý» degen jazýy bar tas qaldyrylǵan. Tas óz ornynda saqtalyp, jaqynda oǵan «Polısıa» degen belgi qosylǵan.