Búgin Gonkongtegi AsiaWorld-Expo kongres jáne kórme ortalyǵynda semserlesýden álem chempıonaty bastaldy. Oǵan Qazaqstannan 22 sportshy qatysýda, dep habarlaıdy infohub.kz.
Aldymen rapırashylar alańǵa shyqty. Barlyq qazaqstandyqtar aldyn ala jekpe-jekterden ótip, pleı-offke joldama aldy. 1/64 fınalda Ǵalym Nurymov ózbekstandyq Ulyǵbek Úsmánovten 8:15 esebimen utylyp, qorytyndy 109-orynǵa turaqtady.
Osy kezeńde alǵashqy qazaqstandyq derbı ótti. Tımofeı Semenov komandalasy Támirlan Kálıevti 15:13 esebimen jeńse, 1/32 fınalda fransýz Anas Ananǵa jolyqty. Eýropanyń úsh dúrkin vıse-chempıony kúshtirek boldy — 15:13. Qorytyndy klassıfıkasıada Semenov 75-shi, al Kálıev 126-shy oryn aldy.
2026 jylǵy álem chempıonatynyń alǵashqy júldegerleri (erler rapırasy men áıelder shpagasy) 25 shildede anyqtalady. 23 shildege áıelder sablásy men erler shpagasynan aldyn ala jekpe-jekter josparlanǵan.
Semserlesýden álem chempıonaty 71-shi ret ótkizilýde; alǵashqy týrnır 1921 jyly ótken bolatyn. Bul joly erler men áıelder arasynda jekeleı jáne komandalyq synda shpaga, rapıra jáne sablá boıynsha 12 júldeler jıyntyǵy oınatylady.
Týrnırdiń júlde qory 1,02 mıllıon dollardy quraıdy. Jekeleı synda jeńimpaz 40 myń dollar, kúmis júldeger 20 myń, qola júldeger 10 myń dollar alady. Komandalyq jarystarda altyn qurama 50 myń, kúmis qurama 25 myń, qola qurama 15 myń dollarǵa ıe bolady.
Ótken álem chempıonatynda (Tbılısıde) Qazaqstan quramasy shpagashylardyń komandalyq týrnırinde qola júlde alǵan bolatyn.