Sheteldik marketpleıster, áleýmettik jeliler, strımıngtik jáne basqa da sıfrlyq servıster 2022 jyldan beri Qazaqstan búdjetine «Google salyǵy» dep atalatyn 178,8 mlrd teńge aýdardy. Tek 2026 jyldyń alǵashqy jeti aıynda túsimder 51,5 mlrd teńgege jetti – bul memlekettiń ótken jylǵy barlyq túsimimen birdeı derlik, dep habarlaıdy infohub.kz saıty.
«Google salyǵy» dep sheteldik kompanıalardyń qazaqstandyqtarǵa ınternet arqyly taýar satýy jáne elektrondyq qyzmet kórsetýi kezinde tóleıtin QQS-yn ataıdy.
Qazir Qazaqstanda osyndaı QQS tóleýshi 133 sheteldik kompanıa tirkelgen. Olardyń qatarynda Apple, Amazon, Alibaba jáne onymen baılanysty alańdar, AliExpress, Google, Meta, Microsoft, Netflix, OpenAI, Ozon, Temu, TikTok, Samsung, Sony jáne basqa da iri sheteldik kompanıalar bar.
2025 jyly sheteldik ınternet-kompanıalar Qazaqstan búdjetine 57,6 mlrd teńge aýdardy. Eń iri tóleýshi Sıngapýrda tirkelgen, Temu marketpleısimen baılanysty Elementary Innovation Pte. Ltd. boldy. Kompanıa 13,3 mlrd teńge tóledi.
Odan keıin Apple – 11,2 mlrd teńge jáne Steam oıyn platformasyna ıe Valve – 10,3 mlrd teńge tur.
Google Qazaqstanǵa taǵy 7,3 mlrd teńge, al iHerb ınternet-dúkeni 4,9 mlrd teńge aýdardy. Alǵashqy ondyqqa Meta, TikTok, AliExpress jáne basqa da sheteldik ınternet-dúkender endi.
Osylaısha, atalǵan bes iri kompanıa ǵana 47 mlrd teńge, ıaǵnı 2025 jylǵy sheteldik sıfrlyq bıznesten túsken barlyq túsimniń 80%-dan astamyn aýdardy.
Basqa tanymal servısterdiń ishinde eń iri tóleýshi Netflix boldy – 2025 jyldyń qorytyndysy boıynsha strımıngtik platforma 353,9 mln teńge aýdardy.
Spotify 293,1 mln teńge, Zoom – 183,2 mln teńge, Nintendo – 54 mln teńge, bilim berý platformasy Coursera – 33,2 mln teńge tóledi. Samsung Electronics kórsetkishi 9 mln teńge, al IMDb.com – 375,7 myń teńge boldy.
Tórt jyl ishinde sheteldik ınternet-kompanıalardan túsetin túsimder birneshe ese ósti. 2022 jyly búdjet olardan 10,4 mlrd teńge alsa, 2023 jyly – 24,3 mlrd teńge, al 2024 jyly – 35 mlrd teńge boldy. 2025 jyly soma 57,6 mlrd teńgege jetti. Taǵy 51,5 mlrd teńge 2026 jyldyń basynan 1 tamyzǵa deıin tústi.
Aǵymdaǵy jyldyń jeti aıynda sheteldik sıfrlyq kompanıalar 2025 jylǵy somanyń shamamen 89%-yn tóledi. Eger qazirgi dınamıka saqtalsa, jyl qorytyndysy boıynsha túsimder jańa maksımýmǵa jetýi múmkin.