Gresıada orman órtin sóndirý kezinde eki tikushaq soqtyǵysyp, ekıpaj músheleri jaraqat aldy. Astanadan batysqa qaraı 65 shaqyrym jerdegi Psata mańynda bolǵan oqıǵanyń vıdeosynda bir tikushaq ekinshisiniń qalaqtaryna soǵylyp, ol jalynǵa oranǵany kórinedi. Ekeýi de jartasqa qulaǵan. Grekıa BAQ-tyń habarlaýynsha, tórt ekıpaj múshesiniń ekeýi esin joǵaltqan kúıi tabylsa, qalǵandary jeńil jaraqat alǵan.
Bul aptada Gresıada birneshe órt oshaǵy paıda bolyp, kóptegen adam úılerin tastap ketýge májbúr boldy. Qatty jel órtti aýyzdyqtaý jumystaryn qıyndatyp tur. Birneshe eýropalyq el de ystyq tolqyndardyń saldarynan joıqyn orman órtinen zardap shekti. Apta basynda Fransıa men Ispanıada iri órtter boldy - olardyń ekeýi de Madrıd pen Bordoǵa jaqyn mańda oryn alǵan edi. Qazir olar aýyzdyqtalǵanymen, áli de janyp tur. Evakýasıalanǵan 300 myńǵa jýyq adam úılerine qaıta orala bastady.
Grekıada BAQ Porto-Germeno, Psata, Fokıda, Megara jáne Kefalonıany qamtıtyn aýmaqta «tıtanıkalyq shaıqas» júrip jatqanyn habarlaıdy. Onda 500-den astam órt sóndirýshi sońǵy 72 saǵat boıy jaǵdaıdy baqylaýǵa alýǵa tyrysýda. Áýedegi soqtyǵysý «Psata aýdanyndaǵy orman órtin sóndirý operasıasy kezinde» bolǵanyn órt sóndirý departamenti málimdedi. Grekıa BAQ-tyń aqparatynsha, ekıpaj músheleri - eki grek jáne eki rýmyn - 251-shi Áskerı-áýe kúshteriniń bas gospıtaline jetkizilgen.
Orman órtteriniń kópshiligi adamdardyń qasaqana nemese abaısyz áreketinen paıda bolady, biraq klımattyń ózgerýi mundaı jaǵdaılardy jıiletip otyr. Ótken qys jumsaq ári ylǵaldy bolyp, ósimdikterdiń ósýine yqpal etti, al keıingi ystyq kezeńderde olar qýrap, órtke janarmaıǵa aınaldy.