Afına mańyndaǵy Výlıagmenı jaǵajaıynda shezlońti bólise almaǵan eki er adamnyń tóbelesi 82 jastaǵy qarıanyń ólimimen aıaqtaldy. Jergilikti buqaralyq aqparat quraldary taratqan málimetke qaraǵanda, janjal qyzyp, oǵan basqa da adamdar aralasyp ketken, dep habarlaıdy infohub.kz saıty.
Kýágerlerdiń aıtýynsha, jaǵajaıdaǵy shezlońterdi paıdalaný jónindegi kelispeýshilik birden qoıan-qoltyq urysqa ulasqan. Keıin oǵan ózge de adamdar tartylǵan.
«Kaθηmerını» gazetine sóılegen bir kýáger oqıǵa ornyndaǵy abyr-sabyr sonshalyqty zor bolǵanyn, aıqaı-shý jaǵajaıdyń arǵy shetinen-aq estilgenin jetkizgen.
Aqparatqa sáıkes, 76 jastaǵy er adam ustalyp, onymen birge bolǵan 21 jastaǵy qyz da qamaýǵa alynǵan, alaıda keıin ol bosatylǵan. «Ta Nea» kúndelikti gazetine sóılegen kýágerler qyzdyń beti qanǵa boıalyp, isingenin aıtqan.
Tóbeles kezinde 82 jastaǵy qarıa qulap qalǵan. Túrli derekkózge qaraǵanda, jedel járdem kelgenge deıin oǵan júrek-ókpe reanımasıasy jasalyp, defıbrıllátor qoldanylǵan. Er adam aýrýhanaǵa jetkizilip, sol jerde kóz jumǵan.
Taǵy bir kýágerdiń sózinshe, marqum basqa adamdardy kútip turǵandaı kórinip, shezlońty aldyn ala bosatqan. Alǵashqy kelispeýshiliktiń sebebi de osy bolǵan sıaqty.
Quqyq qorǵaý organdary qoıan-qoltyq urysqa ne sebep bolǵanyn jáne er adamnyń ólimine ne ákelgenin tergep jatyr.