Grekıanyń Sıfnos aralyna qoný aldynda tikushaqtyń qulaýynan jas jubaılar men ushqysh qaza tapty. Polısıa apatqa mehanıkalyq aqaý sebep bolýy múmkin dep boljap otyr. Bul týraly infohub.kz saıty habarlaıdy.
Jeke jaldamaly Bell 206 tikushaǵy jerge qulap, jarylyp órtengen. Qulaý aldynda onyń "birtúrli dybys" shyǵarǵany habarlanǵan. Polısıa qyzmetkeriniń aıtýynsha, 30 jastaǵy Marı Ebert pen 31 jastaǵy Aleksandr Kromı esimdi brıtandyq jubaılar dúısenbi kúni keshke qaza tapqan. Olar jaqynda úılenip, bal aıyn Sıfnosta ótkizýdi josparlaǵan.
Egeı teńiziniń ákimshilik ortalyǵy Sıros aralyndaǵy sheneýnikter ushqyshty 53 jastaǵy Gıorgos Raıkos dep anyqtady. Ol burynǵy áskerı ushqysh jáne "óte tájirıbeli" bolǵan. Derekkózdiń aıtýynsha, tergeý tikushaqtyń qozǵaltqyshyndaǵy aqaýǵa baǵyttalǵan. "Bul — naǵyz tragedıa", — dedi ol.
Sıfnos ákiminiń orynbasary Manolıs Fýntolakıs grek telearnasyna bergen suhbatynda aımaq turǵyndary tikushaqtyń birtúrli dybys shyǵarǵanyn, bálkim áýede mehanıkalyq aqaý bolǵanyn jáne vınttiń durys jumys istemegenin aıtqanyn jetkizdi. Sondaı-aq, tikushaqtyń baqylaýdan shyǵyp, aınala bastaǵanyn kórsetetin beınebaqylaý jazbalary zerttelýde.
Grekıanyń qoǵamdyq telearnasy ERT jergilikti turǵyn Antonıs Zambelıstiń sózin keltirdi: "Tikushaq úılerden 50 metrdeı qashyqtyqta jáne Panagıa tıs Vrısıs monastyrynyń janyndaǵy qoný alańynan 50 metr jerde qulady". Apat ornyn tútin basyp, qutqarýshylar úsh adamnyń máıitin tapqan.
Grekıanyń ınfraqurylym jáne kólik mınıstrligi tergeýdi úılestirip jatyr. Sıfnos ákimi Marıa Nadalı: "Biz tańǵaldyq jáne qoný alańynyń janyndaǵy oqıǵanyń saldaryn tıisti qyzmettermen birge joıýǵa tyrysyp jatyrmyz", — dedi.
Grekıada jeke tikushaq jaldaý tanymal bola túsýde, týrıser Ion jáne Egeı teńizderindegi araldar arasynda qatynaý úshin olardy jıi jaldaıdy. Buryn shalǵaı sanalǵan Sıfnos Afınadan ońtústik-shyǵysqa qaraı shamamen 195 shaqyrym jerde ornalasqan jáne oǵan parommen birneshe saǵat jetýge bolady.